تعليق متأخر عن العشق و الهوي

- تعليق متاخر
للمرة ربما المليون ادخل في جدل حول فيلم عن العشق و الهوي وتحديدا حول شخصية عمر
اصدقاء وصديقات
وتري دائما كل البنات في مصر ان عمر ( احمد السقا ) في الفيلم هو الشخص الاناني والشرير والذي علي حد تعبير احد الصديقات ( خد كل حاجة هو عايزها )
انا لا انكر اني متعاطف جدا مع عمر
ليس لاني ذكر في مجتمع ذكوري مش عارف عامل ازاي كما نعتتني مها حينما تناقشنا حول الفيلم
انا لم اظبط نفسي سابقا متلبسا بتهمة الذكوربة
بالعكس انا في كثير من ارائي انحاز تماما للبنات في مصر من ظلم وقهر اراه وافعا من مجتمع فيه الكثير لا اريد ان اخرج من الموضوع

نعود لعمر

عمر بقي راجل وقع في حب واحدة بعد شوية ولظروف ان اختها بتشتغل في بار معرفش يتجوزها
نقدر نقول عادي
والراجل من لخبطته واحباطه قعد يشتغل وقرر انه يملي الفراغ العاطفي اللي في حياته و انه يتجوز قسمت الفتاة التي تحبه منذ الصغر و اللي مولعة صوابعها العشرة شمع علشان تسعده وبدون كثير من التفاصيل المملة ورغم ان قسمت حد كويس الا انه محبهاش
عادي جدا
بجد يعني ... عادي جدا
مش المفروض اني الانسان يحب كل حد كويس زي قسمت
لما منة شلبي قالتله " قالته مينفعش تبقي خارج متبهدل من حدوتة حب وتعرف تحب حد تاني حتي لو كان مين "
قالها " المشكلة اننا بنكون اخدنا بالنا بعد ما نكون سحلنا ناس كثير في سكتنا
كل ذنبهم انهم بيحبونا واحنا لازم نقدر انهم بيحبونا يا أما نبقي انانيين ورمم "
اعتراف منه انه مش بيحب مراته
الراجل معترف بغلطته
وحب واحدة تانية واتجوزها وساب الاولي
فين الانانية
؟؟؟؟؟
وعلي فكرة العودة الي الصواب خير من التمادي في الخطأ وشجاعة يحسد عليها
وايه بقي الصح في انه كان يفضل مع قسمت وهو مش بيحبها ؟؟؟
وكام راجل وست بعد الجواز في مصر اكتشفوا بعد الجواز ان الحب ده مش زي ما كانوا متخيليين
بس مش عندهم الشجاعة يكملوا ؟؟؟ اعتقد كثير اوي

المهم ان المشهد اللي كل الناس بتعترض عليه هو مشهد الرسالة اللي بعتها لمنة شلبي ( سلمي )
وقالها بتحبيني
البنات بتفكر وتقول انه هو بعت الرسالة دي وهو مع مني زكي علشان يشوف منة شلبي هترد عليه هتقوله ايه ؟؟؟
لو قالته بحبك ... هيكمل
ولو قالته مش بحبك مش هيكمل ؟؟؟ ويرجع لمني زكي


الفكرة انه كان يومها فعلا تعبان لانه اخوه ساعتها اعترف له بحبه لمراته في لقطة من اقوي لقطات الفيلم
الراجل تايه وبيدور علي حد يكلمه ولقي مني زكي قدامه وقالها انه عايز يفضفض ويتكلم وحد يسمعه ....ولما قعد يتكلم معاها وقالها " انا تعبان و بسبب الم واذي لكل الناس اللي بحبهم ويحبوني انا نفسي احب واتحب بس انا مش حمل ان حد يكرهني "
كلام معبر تماما عن مشكلته اللي في كل الفيلم
هي مسمعتش ولا عرفتش ايه مشاكله وقعدت تحكي عن اخبارها ولما غلط في اسمها افشت وقامت ورفضت صداقته
هو خلاص مش بيحبها وده واضح من زمان اوي اوي ........ هي بقي اللي كانت عايزاه يرجع ويبدي الندم ويقولها بحبك وانه غلط معاها

عندهم حالة ملل

عندي حالة ملل ......بفقد فيها الأمل ....مش عارفة عايزة ايه ...مش عارفة رايحة فين .....محتاجة اشوف حاجة تسعد قلبي الحزين .....يمكن محتاجة حب يهزني ويلفني ويجيني من كل اتجاه .....يمكن محتاجة قلب يحسني ويرد كل مشاعري تاني للحياة
عندي حالة ملل
أغنية لسميرة سعيد

كل ما اقابل بنت تقولي انا مكتئبة وزهقانة شكوي سمعتها في الشهر الاخير حوالي عشرين مرة من بنات كثير
الفكرة بقي ان كلهم عندهم فراغ عاطفي
انا عارف ان الفراغ العاطفي صعب بس هما بيستسلموا ليهم فيما يشبه المرض الجماعي
في ناس بتعوض الفراغ العاطفي بأنها بتشارك في انشطة كثير وتخرج تعطي الطاقة الزيادة للمجتمع
طبعا هو مش حل لكن مسكن كويس
الاهم بقي اني مش عارف الرجالة راحت فين ؟؟؟!!!!
ربنا يهدي

هي الناس مالها ؟؟

ما هو يا الناس مش طبيعية يا انا مجنون ؟؟؟
الناس غريبة وبتعمل حاجات اغرب
مش كده ولا ايه ؟؟؟

وراء كل بنت معقدة شاب عقدها

فجأة كده وبالصدفة واحدة صديقة حبيت توريني الجروب ده
http://www.facebook.com/group.php?gid=2782475203

قبل ما اشوف الجروب كنت بقول لنفسي البنات في مصر عايزين علاج من الامراض المستعصية اللي عندهم
اول ما شفت الجروب قولت بنات البوبي دول انا هعمل ليه جروب مضاد ونلم فيه كل فضايحهم ما هما برضه ليهم حركات تفرس
المهم بقي لما تعمقت في الموضوع وفي الكلام اللي كاتبينه
لقيت للأسف بقي في كل حكاية بيحكوها بشوف واحد من اصحابي بحركاته النص لبة وانا اكيد مش ببقي واخد بالي
من اول بتاع كنت مع ماما عند الدكتور لحد بتاع خلينا اصحاب علشان انا مش انفع في الجواز غير طبعا حركات التليفونات اللي هما قايلين فيها قصائد
مش هنكر ان في شوية حاجات البنات فاهمها غلط وان في حاجات بتبقي فعلا عن الولاد البنات مش تفهمها ولا تقدرها واكيد العكس كمان موجود
لكن الحقيقة انا متعاطف جدا مع البنات دووول واللي شافوه
واكيد انا لما هقابل واحدة مش متزنة هعرف انه وراها شاب عقدها
ميرسي لصديقتي اللي اتااحت ليا الفرصة الجميلة دي ويا ريت يا بنات تاخدوني معاكم متضامن و أهو تسمعوا وجهة نظر تانية ممكن تكون مفيدة
تحياتي

الحكومة لا تركن في الممنوع

رمت بي الاقدار لقضاء عطلة نهاية الاسبوع في مارينا وخلال صلاة الجمعة في المسجد هناك كان التزاحم شديدا جدا حيث لم يكن هناك مكان لقدم داخل المسجد بل وخارجه امتلأت كل الطرقات بالمارة وسيارتهم وعلي هذا لم نجد مكان لنركن السيارة و وفي وجود ظباط الشرطة لم يكن الركن سهلا الا اننا وبعد ركنها (صف تاني بعيدا) وخلال عودتنا للجامع سيرا علي الاقدام وجدت الظباط ملتفين حول سيارة مرسيدس ودون ان اعلم من بداخلها ادركت انه شخصية مهمة وهو ما لفت نظر كل من كانوا معي وبعد ان ادركت من هي الشخصية المهمة والذي كان وزير حالي في الحكومة
بصراحة انا قولت انه المفروض يكون اول واحد مش يركن في الممنوع ولكن اللي نرفزني بقي ان اصحابي يقولوا لا طبعا حقه هو وزير ليه !!!!!!

فضلت طول الخطبة واقف متنرفز لحد ما انتهت الصلاة ووجدت نفسي اذهب إلي الوزير لاقول له انه قدوة واني كنت اتمني ان يكون اول من لا يقف في الممنوع – الراجل ذوق وقال انا اسف – وهو ما فسره الاصدقاء انه قال عليا مجنون وخدني علي أد عقلي

القضية ليست قضية وزير ركن في الممنوع ولكنها قضية ان شباب مثقف وواعي ويشغل مناصب هامة في مجاله ومع ذلك يري انه وزير يعني حقه ان يخالف القانون وانه يركن في الممنوع في حين ان الدولة لما اختارته كان هدفها ان يرعي مصالح الوطن ويحافظ علي قوانينه (هكذا القسم) من اول قانون المرور وحتي قانون العقوبات افهم احيانا ان يكون له استثناء مثلا في ظروف عمله كصالة كبارالزوار مثلا في المطار ولكن ليس في مارينا وهو يقضي عطلة نهاية الاسبوع
ما أود ان اقوله انني صدمت ليس من الوزير ولكن من الاصدقاء لانهم اعطوه حق ليس حقه واتهموني بالجنون او في احسن الاحوال التهور لاني فقط اردت ان اقول كلمة عن ما اعتقد انه الحق

المشكلة ليست في الحكومة ولا النظام المشكلة في من اعطي الحكومة من الشعب تفويض ممهور بتوقيع بأن تفعل ما يحلو لها
بس انا بقي هفضل مجنون وهفضل اعمل حركات الجنان بتاعتي ضد كل ما اراه خطأ من الحكومة ومن شعب اصبح يتلذذ بأن يكون متخلف
تحياتي

ذكري الشهيد فرج فودة

أرملة الشهيد وابنته

"صدري مفتوح لكم ايها الصناديد ولست اكرم من
عمر بن الخطاب او علي ابن طالب او غاندي في العصر الحديث, وصدقوني اذا ذكرت لكم
انني منذ شرعت قلمي اعلم يقينا
كيف ستكون نهايتي وانني بقلمي وبكلماتي اشعر دائما
انني اقوي منكم جميعا ويبدو لي انكم لم تتعلموا شيئا ولم تفهموا شيئا, ولو تعلمتم
لعلمتم ان الجسد يفني والكلمة تبقي وان الرصاصة تصيب والحرف يقتل وان زمن الرصاصة
جزء من الثانية, بينما امد الكلمة إلي ان يرث الله الارض ومن عليها "مرة اخري"
صدرنا مفتوح وقلمنا شرع ونفوسنا راضية مرضية "

فرج فودة

هذا ما كتبه الشهيد فرج فودة وكان بالفعل يعرف
نهايته ويعرف ايضا ما نحن مقبلين عليه ولا اجد سوي تلك الكلمات انقلها لكم مثلما
ستجدون كتابه الذي دفع حياته ثمنا له علي مدونتي لتبقي كلمته إلي ان يرث الله الارض
وما عليها

هنا تجدون الكتاب :

الحقيقة الغائبة

انا استقلت

أنا استقلت
من حوالي 10 ايام وفي هدوء اعلنت استقالتي من شركة الشباب اللي بيقولوا علي نفسهم ليبرالي
القرار ده اتأخر لسبب اني مش متعود انسحب من أي نشاط ولاني كنت واخد قرار بالاستمرار من الاجل الاصلاح لكن عموما اللي حصل حصل
كنت ناوي اقعد ساكت لحد لما لقيت واحد عامل جروب وبيقول اتحاد الشباب الليبرالي " انت ليبرالي بجد ولا كده كده علي العموم هنشوف ونعرف" كل اللي فيه 7 اصلا ونصهم فاكرين انهم عباقرة البلد اللي هيجيبوا الديب من ذيله
الحقيقة الكلمة مستفزة هما نصبوا نفسهم كهنة الليبرالية ودراويشها
واللي مش معانا يبقي من الضالين في حين انه في جروب تاني للناس الليبرالية فيه 500مصري لا بتوع سفر ولا بتوع سبوبة انا مش هقول حاجة لان اللي عندي قولته قبل كده هنا وممكن ازيد عليه ان هناك بعض الفاشلين والمطرودين من منظمات المجتمع المدني
و الاحزاب المحترمة لقوا في الموضوع (سبوبة) للسفر وللتمويل وانهم لما يحولوا الاتحاد لشركة هتبقي اسهل

وكمان شوية كائنات نتية( لا تظهر الا في التصويت علي الانترنت) تلاقيها مع الناس بمنطق الموافق علي ما يقال يرفع يده يقوم كام واحد يرفعوا ايدهم علي وعد بحتة من التورتة اللي هتكبر لما الشركة تشتغل والسوق يمشي وخصوصا ان سوق الكلام في الديمقراطية والليبرالية والاصلاح والشباب سوق حلو وواعد للشركات والدكاكين اللي فتحت جديد واللي هتفتح.
انا شخصيا لما وقعت علي البيان التأسيسي كان بهدف محاولة اقامة أي نشاط لنشر الفكر الليبرالي بين الشباب وتوسيع قاعدة الشباب الليبراليين في مصر مش علشان شركة وابقي رجل اعمال بدل ما انا عاطل
طبعا هي بقت شركة بعد ما ده الشكل القانوني اللي وافق عليه الشركاء
علشان السبوبة تبقي بعيد عن الجمعيات وقانونها اللي دمه ثقيل وعلشان يبقي كله في
السليم ......السليييييم
مش في نيتي اني اعمل كيان موازي و ابقي زي الاخوة الناصريين والقومجية والشيوعين انا مازالت عند ليبراليتي الحمد لله ولم اصبح رجل اعمال من بتوع شركة الشباب الليبرالي المصري

تقرير عن أحداث الفتنة الطائفية في العياط

لتحميل التقرير اضغط هنا :

http://www.horytna.net/Articles/Details.aspx?TID=3&ZID=18&AID=513

مدونتي في الاذاعة

اسمعوني في برنامج مدونة علي الهوا

أذاعة حريتنا

ممكن تنزلوا الحلقة من هنا

http://www.horytna.net/Articles/Details.aspx?TID=3&ZID=55&AID=485

اللعب مع الكبار ...تيجي نلعب

اللعب مع الكبار

تقوم الفكرة الاساسية لفيلم عادل امام ( اللعب مع الكبار) علي التصنت علي مكالمات التليفون عبر صديقه ( محمود الجندي) والذي ينقلها بدوره إلي عادل امام فينقلها للبوليس علي انها احلام وبذلك يمنع حدوث كوارث كثيرة لمصر

منذ عدة ايام
وخلال مشاهدتي للفيلم مع صديقي محمد جورج طرحنا سؤال ماذا لو ؟؟؟؟؟؟

ماذا لو كنت مكان محمود الجندي وتجلس في السنترال المركزي في شارع رمسيس ومسموح لك بان تستمع
إلي مكالمة تليفون ؟؟؟ من ستختار ان تستمع إلي مكالماته ؟؟؟؟

الاختيارلأول وهلة يبدو سهلا ولكن بالتدقيق لن يكون هكذا

انا حبيت اشاركم لعبة ماذا لو وكل حد فيكم ليه ثلاث خطوط تليفونات بس مسموح ليه يسمعهم
طول الشهر مع العلم ان خط الراجل الكبير وابنه متأمن وكمان ابنه في شهر العسل فيبقي
الاختيار برة الاتنين دول !!

أحب أعرف ومنتظر تعلقياتكم