8/22/2008

العجمي...تل أبيب... والبيكيني الأحمر


كنت في العجمي مسترخي علي الشاطئ أتأمل في البنات الجميلات من حولي وفجأة وجدت فتاة من أجمل ما رأيت في حياتي ترتدي بكيني أحمر ساخن تأتي ناحيتي وهي تبتسم وتقول لي
ماذا تريد ؟؟؟؟
فسألتها: مش فاهم؟؟!!
قالت لي: أحلم أتمني !!!
لأول لحظة تصورت إنها عايزة حاجة مش مظبوطة... وقولت نشوف السكة بقي
قولت: لطيف... أنتي مين بقي ؟؟؟؟
قالت: الأسماء مش بتفرق
قولت: طيب هناديكي ب إيه ؟؟؟ طبعا أنا كنت بقول كده وأنا ببص بصة مش بريئة
ردت: لا أنت فهمت غلط
قولت: فهميني الصح ؟؟؟؟!!!
قالت: أنا مش واحدة زى ما أنت فاهم..... أنا مش انسانة أنا من الجن الأزرق
قولت لها: بتهرجي !!!!
طبعا كنت متصور إنها بتهرج وإنها بتعمل عليا فيلم
قالت لي: شكلك مش مصدق.... أنا مسئولة التنقل بين الزمن في عالم الجن الأزرق ولقيتك شكلك زهقان قولت أجي أخليك تتنقل شوية
نظرت لها في شك وأنا أفكر أنها أكيد بترسم عشان نروح البيت وتقولي هتنقلني بقي بالزمن والكلام ده
فرددت: طيب و المطلوب ؟؟؟!!!!
قالت: تغمض عينك وتجيب ايدك بس
في نفسي بقي قولت ربنا يستر.... أديتها أيدي وفجأة كأن كهرباء زى الهزاز في الموبايل و
قالت لي: تحب تروح في أي سنة ؟؟؟
رديت: مش هتفرق !!
سمعت صوتها وهي تقول لي فتح عينك
فتحت عيني فوجدت كل شئ مكانه
تصورت أنني غفوت في حلم جميل لان البنت كانت حلوة أوي وقولت مش كان كمل الحلم ده في أي حتة !!!!
ببص جنبي لمحت الجورنال
لقيت مانشيت الأهرام
إسرائيل عضو في الاتحاد الأوروبي بإجماع الآراء
قولت يا نهار اسود !!!!!
فتحت جوة الجورنال لقيت إن الاتحاد الأوروبي وافق علي ضم إسرائيل إلي عضويته بعد معدلات النمو الغير المسبوقة اللي حققتها
يا نهار اسود ؟؟؟؟!!!!!!
فتحت صفحة ثانية لقيت مكتوب
الخارجية المصرية: اتفاقياتنا مع الاتحاد الأوروبي هي عضوية ينقصها الانضمام الرسمي وفقا لمرجعية برشلونة ولا تأثير لانضمام إسرائيل علي عملية السلام
سالت صديقي الجالس بجانبي وفي يده زجاجة من البيرة:
هي إسرائيل بقت عضو في الاتحاد الأوروبي ؟؟؟؟
رد: إيه يا عم أنت مش عايش ولا إيه ؟؟؟؟
أنا: لا قصدي ازاي ده حصل
رد: اللي ازاي ده حصل ؟؟؟ دولة وانضمت للاتحاد الأوروبي عادي
أنا: طيب وبعدين ؟؟؟
صديقي: إيه اللي بعدين ؟؟؟ مالك يا ابني؟؟؟
أنا: يعني والفلسطينيين ؟؟؟؟
صديقي: مالهم.... النهاردة فتح اغتالت قائد الجناح العسكري لحماس في غزة ردا علي اغتيال حماس لقائد فتح في القدس.... ومصر هترعي حوار فصائل...
وأضاف ضاحكا وهيفشل ويروحوا يتفقوا في البحرين أو قطر.. أنت يا ابني مش الجرائد جنبك ؟؟؟؟
أنا: أيوا أنا بسالك عادي يعني...طيب وبعدين ؟؟؟؟
صديقي: مصر بتدرس وقف قبول المعونات الأوروبية بعد انضمام إسرائيل
أنا: أه عندهم حق والله....
تصفحت الصحف مرة اخري
وجدت كلام كثير عن معدل النمو الغير مسبوق في مصر بس أسماء الوزراء كانت متغيرة وأنا لسه هسأل عن الوزراء ليه اتغيروا لقيت فجأة مقال فهمي هويدي عنوانه " إسرائيل في الاتحاد الأوروبي والعرب في الحظيرة الأمريكية"
وبعد الاستشهاد بمقالات كتاب من صحف إسرائيلية ليؤكد أن ما حدث كان نتيجة تخاذل العرب في الضغط علي أوروبا لمنع إسرائيل من العضوية في الاتحاد بعد تهديد أمريكا لهم وفتح ملفات الحكام العرب في الفساد وغياب الديمقراطية في دولهم.
عدت إلي صديقي متسائلا

أنا: هي إسرائيل دخلت ازاي في الاتحاد الأوروبي ؟؟؟
صديقي: يا ابني أنت مالك النهاردة.... بلد متقدمة وبتنتج أد اللي إحنا بننتجه عشر مرات مش تبقي ليه عضو في الاتحاد الأوروبي
أنا: طيب وملف حقوق الإنسان ؟؟؟ و صابرا وشاتيلا وكده ؟؟؟
صديقي: ماله ؟؟؟ يا ابني دي ذكريات ومتاحف لينا إحنا بس ونعيط ونفتكرها لكن الدنيا دلوقتي بتعرف الإنتاج والتقدم وترتيبنا في تقارير التقدم.... زى متاحف نجازاكي وهيروشيما كده يا عم بس طبعا إحنا مش اليابان
أنا: يعني قتل الفلسطينيين وكده ؟؟؟؟
صديقي: يا ابني الموضوع انتهي من زمان الفلسطينيين هما اللي يقتلوا نفسهم دلوقتي
أنا: طيب ومصر ؟؟؟ والرئيس ؟؟؟
صديقي: لاااااا.... أنت شكلك سخن.... الشمس يظهر سيحت دماغك وتقولي عايز تاخد تان
أنا: يا أخي قولي بس.... هو مين رئيس مصر ؟؟؟؟
صديقي: فجأة لقيته رمي في وشي زجاجة البيرة....
صحيت من النوم فجأة وبصيت ناحية البنت الامورة اللي كانت قاعدة جنبي الناحية الثانية بالبكيني الأحمر... لقيتها بتلم في حاجتها وماشية من غير ما تبص ناحيتي حتى !!!!!!
رغم أنها هي اللي خلتني أروح من شوية للمستقبل !!!!!!

ليست هناك تعليقات: