12/18/2010

افتراءت ناجحة علي الحزب الوطني

أقف كثيرا متعجبا من الافتراءات التي تقع علي الحزب الوطني و التي يبدو بعضها ذو وجاهة ما الا ان الكثير منها و الاكثر ذيوعا و انتشارا يخرج كثيرا عن الموضوعية بل و احيانا العقلانية
زادت تلك الافتراءات بعد الانتخابات الاخيرة و بمناسبة مؤتمر الحزب السنوي فأنني وجدت انها مناسبة لدرء الافتراءات

حكومة الحزب الوطني
سعت الانطلاقة الجديدة للحزب في عام 2002 و التي حملت عنوان شهير هو "فكر جديد " الي ترسيخ مفهوم حكومة الحزب بديلا عن حزب الحكومة
الغرض واضح جدا و هو الانتقال الي الممارسة السياسية الصحيحة بأن يقر الحزب السياسات و ان تتولي الحكومة التنفيذ و يتابع الحزب التنفيذ و مدي نجاح تلك السياسات بالتنسيق مع الحكومة
للاسف الشديد يحمل البعض الحزب أكثر مما يحتمل في هذه النقطة تحديدا و تحول هذا الشعار سيف علي رقبة الحزب
فالحزب مسئول عن وضع السياسات و متابعة تنفيذها و لكن وزراء الحكومة ليس لهم دفتر حضور و انصراف صباحي في الحزب كما يحاول البعض ان يصور ان عملهم هو ارضاء الحزب و أعضاءه فقط
ستجد أي قرار ولو اداري صغير بنقل موظف مهمل او حتي رئيس هيئة او مصلحة او تنفيذ او تنظيم مرفق ما يتم نسبه فورا الي الحزب كله و الي أمانة السياسات "تأسست أمانة السياسات ضمن الهدف السالف ذكره في التحول نحو اقرار سياسات من الحزب"
المثير في الامر ان أي موظف او مسئول يتم نقله او انهاء خدمته يخرج ليقول انه علي خلاف مع امانة السياسات و الحزب و ان رجل وطني عظيم و الاكثر اثارة هو ان هذا القول يمنح صاحبه بطولة مجانية و مساحة في صحف تتصيد كل شئ في اطار التشويش علي أي جهد حقيقي من اجل مصر.
الحزب الوطني نشأ في السلطة / الحزب يعتمد علي البيروقراطية و موظفي الدولة
نفر من أساتذة العلوم السياسية والذين يحتلون الواجهات في الفضائيات و برامج التوك شو الليلية و لهم مقالات أسبوعية و شبه يومية في بعض الصحف بل و بعضهم أعضاء في حركات معارضة
ستجدهم يتبنون دائما و يرددون تلك المقولة السخيفة عن نشأة الحزب في رحم السلطة
حيث يتم نزع و مسح كل التطور الذي لحق بالحزب و الجهد التنظيمي و التحول و التغير النوعي و الكمي و الكيفي في نوعية العضوية وثقافتهم و درجاتهم العلمية
وبغض النظر عن ان هذا يعبر عن فشل تحليلي عظيم لهؤلاء الاساتذة و عدم مواكبة للتطورات فاغلبية اعضاء الحزب الان في كل المستويات التنظيمية ليس لهم ارتباط هيكلي بالدولة كما يدعون دائما او يتغاضون عن هذا غالبا بل ينكرون ان الحزب خرج من رحم السلطة من زمن بعيد و انه يمر بمرحلة نضوج سياسي حقيقي .
حزب رجال الاعمال
نفس المحللين السابقين في تناقض واضح بعد ان يأكدوا علي انه حزب نشأ في رحم السلطة و بعد ان يستعرض واحد منهم عبقريته التحليلية العظيمة و يقول انه لن يعترف بالحزب الوطني كحزب بعيدا عن الدولة الا عندما يراه في المعارضة
بعد هذا في نفس الجملة يقول الرجل ببلاهة سياسية عظيمة تناقض نفسه يقول ان الحزب الوطني هو حزب رجال الاعمال
ولأنني لا اعرف ان رجال الاعمال موظفين في الدولة فأن الرد سيكون بالرجوع الي النقطة السابقة والرد عليها
و اعرفوا نوعية الاعضاء في الحزب الوطني يا سادة قبل ان تحكموا عليه
شباب الحزب الوطني مرتزقة يأخذون مرتبات أو ينضمون للحزب من أجل البحث عن فرصة عمل
هذه واحدة من أكثر الافتراءات التي تثير غيظي في الحقيقة
فلكي تريح نفسك من الجهد في البحث عن مفتاح نجاح الحزب الوطني فان اسهل شئ هو ان ترميه بأكاذيب و تستغل بعض الحوادث الصغيرة ولكي توظفها في تشويه صورة تنظيم حزبي قوي كالحزب الوطني
و طالما الحزب الوطني فيه رجال اعمال و بيروقراطية عظيمة في وقت واحد فأن هؤلاء يصرفون اموالهم بالضرورة لشراء الشباب
و لا مانع ابدا من اتهامي ان هذه التدوينة مدفوعة الاجر كي اضع نفسي في موقف دفاعي عن مبادئي و ما اؤمن به و تضيع وجهة النظر "راجعو اخر جملة في فقرة حزب الحكومة "
الحزب الوطني و مرشح الرئاسة
ما من جلسة تضم معارضين او مستقلين او أي حديث سياسي علي أي فضائية الا و يتم ببلاهة شديدة طرح سؤال ..من مرشح الحزب للرئاسة ؟ و بعد الغمز و اللمز عن ما يطلقون عليه التوريث يظل السؤال معلق ببلاهة
و الاجابة في المادة (32) من النظام الاساسي للحزب و الموجودة علي موقع الحزب هنا
ربما اعطي البعض العذر لانهم لم يشاهدوها تطبق و لكن خلال عدة شهور سترونه
المثير جدا هنا ان الحزب حدد الية اختيار مرشحه للرئاسة و لكن الجميع يصر دون دليل علي انه سيخالفها (هذا اذا كان يعرف بوجودها من اصله )
فمنذ اقرار لائحة النظام الاساسي للحزب لم يتم مخالفتها في أي وقت حتي الان و لكن ماذا اقول ؟
الحزب يقدم فزاعة اسمها جماعة الاخوان غير القانونية

انا افهم تماما ان تختلف مع الحزب الوطني بأي شكل و لكن التعامل مع الحزب بمنطق عدو عدوي هو صديقي و التضحية بمدنية مصر من أجل حفنة من المتاجرين بالدين هو ما لا أفهمه.
افهم و اعترض جدا ان الدولة (و ليس الحزب) تسمح احيانا ببعض التيارات او بعض القنوات و بظهور بعض الشيوخ لانها تقع في الصراع بين حرية الرأي و التعبير كحق للجميع في مجتمع محافظ و متدين بطبيعته و بين شيوخ يستغلون هذا المناخ في الظهور ثم الانقلاب عليه بفتاوي جديدة و مفاجئة و اراء لا انزل الله بها من سلطان
افهم ان يعترض البعض احيانا مع التعامل الامني مع الجماعة و ان يطالب بتعامل سياسي و ليس أمني كامل
و لكن ما لا افهمه ابدا هو محاولة اعطاء شرعية لجماعة الاخوان الغير قانونية نكاية في النظام و هدم اسس الدولة المدنية
بل و محاولة تصوير الامر علي انه معركة فقط بين الحزب و معارضيه و ان هذه المعركة ليس للاخرين فيها ناقة ولا جمل
في الامر شجون كثير و في الحديث كثير من التفاصيل ربما يحتاج الي تدوينة منفصلة و لكن فكروا فقط ان المعركة ضد التيارات الدينية هي معركة مصر القادمة و تذكروا اننا انهينا و قضينا علي الارهاب في العقد الفائت بتحالف من الكل و م نستمع وقتها لمن قال "سبب الارهاب هو الفقر" بل تكاتفنا و نجحنا
فهل نفعلها ثانيا.

4/05/2010

في فقه الدفاع عن الحزب الوطني

رمتني أقداري لدخولي التويتر بعد انا هجرت الفيس بوك لأسباب كثيرة ..داخل التويتر العدد أقل كثيرا و تشعر ان الاعضاء يعرفون بعضهم البعض مهما كانت هوة الخلاف بينهم
اول ملاحظة لي علي التويتر هي ان الكل ضد النظام
يختلفون مع بعضهم الي درجة الكراهية بل و احيانا الاعتداء علي بعضهم باليد حينما يلتقون الا انهم في النهاية حينما يصل اتوبيس معارضة النظام يركبون جميعا
ليس هذا بالامر السئ فأكيد ان كل سلطة و أي سلطة في العالم لها معارضيها زاد أو قل العدد
القضية بالتأكيد ليست هنا في مجال الكثرة العددية لانهم يمكن حصرهم جميعا في 500 شخص علي اقصي تقدير وهو ما يستطيع الحزب الوطني و بدون أي اموال (كما يدعون دائما) حشد عدد كبير من الاعضاء يفوق هذا العدد بمئات الالاف
و لكن القوة هنا بقوة التأثير
كل شخص فيهم له تأثير في عدد واسع من المؤيدين (عن علم اوجهل) و هذه حقيقة لا يمكن اغفالها
انا الدخيل :
اتصور انني اول شخص يدخل الي تلك المجموعة و عضو في الحزب الوطني
و لكن ما لا يستطيع هؤلاء الاشخاص جميعا قبوله نقطتين :
الاولي : و هي منهجية جدا ..ان هناك فرق كبير ان تكون مؤيد للنظام او ان تكون احد افراد النظام
بالتأكيد انا في الخانة الاولي
انا مؤيد للنظام و لست مسئولا فيه
انا لست مسئولا عن فساد يحدث أو أخطاء او حتي خطايا قد تحدث من المسئولين
و لكن في نفس الوقت ادافع عن ما يفعله النظام و اراه صحيح و متفق مع ليبراليتي و اعترض تماما حينما يخطئ الحزب
حينما يكون هناك خطأ سأقف و اقول خطأ
و حينما يكون هناك شئ صحيح سأقف و اصفق ( للصح و ليس لمن قام به)
الثانية : ان هؤلاء الاشخاص جميعا لم يقابلوا او يتحاوروا مع شخص في الحزب مؤمن بالديمقراطية
انا مؤمن بالديمقراطية تماما
ولا مانع عندي ابدا من ان يخسر الحزب الوطني انتخابات نزيهة و يخرج من السلطة
و سأقف ادافع عن حرية و حق الاخرين في الدفاع و التعبير عن رأيهم (اذا احترموا رأيي) مهما بدا هذا الرأي مختلف معي
انا شخصيا كنت مرشح في الانتخابات ضد الحزب و تم تزوير الانتخابات ضدي
نعم
انا معترف ان هناك كثيرين (و ليس الكل) داخل الحزب يزورون الانتخابات لانهم يعتقدون عن قناعة تامة ان هذا هو الشئ الصحيح و انا اتحدث عن قيادات وسطي و صغري و ليس قيادات كبري لانني لا اتعامل معهم الي نطاق محدود خلال اجتماعات
ليس في نيتي الانسحاب ابدا ...بل انني سأقف لان علي الفاسدين و المخطئين الانسحاب من أمامي لأنني اقوي و أملك فكرا ليبراليا و لست منافق او مطبل للسلطة
من حق من يعارض ان يري ان النظام فاسد و فاشل
و مني ابسط حقوقي الا اري الصورة بهذا السوء
من حقهم ان يهاجموا
و من حقي ان ادافع حينما يكون هناك مجالا و ان اصفق لهم حينما يكون هجوما صحيح
تعديلات المادة 76 لا تتعارض مع ليبراليتي ...نعم انا ضد ان يكون كل من هب و دب مرشحا لرئاسة الجمهورية و لابد من ضوابط ( و اراهن انه لو تم فتح باب و ترشح صاحب كشري ابوطارق كدعاية للمحل سيطالب هؤلاء بوضع ضوابط)
انا مع قانون الضرائب الجديدة و مع الخصخصة ( وليس الفساد الذي يحدث خلال عملية الخصخصة)
انا مع حق التظاهر السلمي (وليس القمع الامني)
انا مع دولة قوية لها هيبة و تحفظ النظام و تطبق القانون علي نفسها قبل الاخرين (وبلا فساد)
انا اري اننا نتقدم بخطي اتمني ان تكون اسرع
انا مع الحرية الاقتصادية و السوق المفتوح
انا مع اتفاقية السلام و ضد الغائها (اختلفوا ما شئتم حولها و لكن فليخبرني أحدكم أي التيارات السياسية الموجودة يؤيدها غير الحزب الوطني)
انا ضد هدم الدولة و اعادة بنائها علي مزاج هؤلاء المناضلين
انا من تجربتي ان الحزب الوطني هو حزب الوسطية ( علي الاقل فكريا) و يحاول ان يترجم هذا عمليا
و انا اؤيده
و سأري ان البدائل المطروحة كلها غير واقعية ...هذا ابسط حقوقي مثلما هو حق لكم ..هل يكفي هذا ؟؟؟
تحياتي

2/27/2010

البرادعي .....سياسة في بلد غاب عنها السياسيين

مساء الخير
بقالي كثير أوي مش كتبت حاجة لأن عندي ظروف منيلة بستين نيلة و مش في المووود خالص
بس يالا ان شاء الله خير
الله ما أجعله خير صحيت لقيت البلد مقلوبة علشان البرادعي جاي
المهم موضوع البرادعي ده سياسيا لطيف اوي اوي اوي .... و كمان أوي
خلينا أولا نبعد شوية عن حكاية رئاسة الجمهورية
مرشحين رئاسة الجمهورية رسميا مش هتكلم عنهم الا لما يتقفل باب الترشيح في 2011 و دي حقيقة كده بصفتي خبرة في الانتخابات
يعني مفيش مرشحين رسميين للانتخابات الا لما يتقفل باب الترشيح و طالما بتوع الحزب الوطني اللي بيظهروا في الفضائيات و مش عندهم غير كلمة واحدة .... الشرعية الدستورية و القانونية
يعني جميل جميل ...الشرعية الدستورية و القانونية بتقول بقي ان رئيس الجمهورية الحالي هو الرئيس مبارك و حتي غلق باب الترشيح في 2011
نيجي بقي للسياسة .... وطالما هنتكلم في السياسة يبقي بتوع الحزب الوطني اللي ارفوا امي في الفضائيات يطلعوا برة لانهم فعلا مش عارفين يتصرفوا
لايصين لوصة البلجيكي اللي راح السنغال
هما معذورين ....بيخاوفوا ..... و اللي يخاف ميلعبش و اللي يلعب ما يخافش ... و هنقول بقي علي تأثير الحكاية علي كل القوي السياسية في مصر
بس الاول نتكلم عن البرادعي نفسه
الراجل بصراحة محترم جدا و حاجة مشرفة ان مصر فيها ناس زي الراجل ده و له مطالب مشروعة و من حقه انه يناضل علشانها
و أكثر حاجة عجباني فيه انه هادي و واخد الامور ببساطة و مش بيتكلم عن أشخاص ...بيتكلم عن مطالب محددة و كمان عنده فكرة انه يلم الناس حواليه و دي حاجة مهمة أوي لان دي باختصار السياسة
يعني ببساطة الراجل داخل معركة اعتقد انه حتي الان هو ماشي فيها كويس و ان ادائه و مطالبه هايلين و بصراحة هو عامل زي المهندس اللي جه يوري السباكين انهم مش فاهمين أي حاجة في تركيب المواسير
بس خليني اقول ملاحظتين بقي
الاولي : ان النشطاء الموجودين جنب البرادعي و بيقابلوه نشطاء الانترنت و الفضائيات هما في الاخر لسه مش ليهم شعبية و لا قواعد كثير و في منهم لو فكر ينزل انتخابات حتي لو نظيفة مش ياخد غير صوته و بالتالي سيكون التحدي الاساسي للبرادعي هو الخروج من دائرة الجماعة دول و الاحتكاك بالناس بجد و توسيع قاعدته الشعبية الحقيقية
الثانية : ان اساسا الناس دي اللي حواليه برضه هما مطاريد الاحزاب و الناس اللي ضد النظام كله علي طول الخط و دول فيهم عيب سياسي خطير و ناسف وهو انهم مش بيرضوا باي صيغ توافقية و عندهم قناعة ( انا مش عارف جابوها منين ) انهم مبعوثي الديمقراطية و تخليص الشعب من الظلم و القهر و ده يعني بصراحة حاجة كده تخليهم برضه ناس فكسانة
و انا هنا بتكلم عن كل الجوقة اللي جنبه مش عنه ....الراجل كويس و بيسمع و كلامه كويس و عاقل حتي الان ..
المعارضة الرسمية
و دول بقي سياسيين لطاف ودول أكثر ناس هتستفيد من اللي هيحصل
لان لو البرادعي نجح في أي مطالب هما قوي شرعية و أقوي منه بالخبرة و الشرعية و يقدروا يأخدوا مكاسب كويسة ولو البرادعي فشل فهما كده كده باعوه و هياخدوا برضه صفقة حلوة مع الحكومة ...هتفضل مشكلة الانفصاليين من الاحزاب دي و هي هتبقي خسارتهم الوحيدة و اعتقد اكثر حزب معرض للانقسام حول القضية دي ممكن يكون الوفد لو التسريبات المنشورة صحيحة
رفعت السعيد كمان رسميا مش ممكن يكون عاقل
هو ساب كل الكلام و اللي بيحصل و متضايق ان ضمن وفد زيارة بيت البرادعي كان الكتاتني و اعتبر ان ده رهان علي التيار الاسلامي و تقريبا لو قالوا للتعيس ده ان في زلازل حصل في اليابان هيقولهم بسبب دعوات الاخوان المسلمين ..... يالا زمن .......ولا بلاش
الحزب الوطني (نجوم الفضائيات)
مجدي الدقاق و من لف لفه
دول بقي يا عيني صعبانين عليا اوي مجدي الدقاق بيتكلم عن الاستقرار و الفوضي اللي ممكن تخلقها مثل هذه الحركات اراهن انه لو جبنا حديث ليه من 2005 مثلا و ركبناه علي النهاردة هتلاقيه بيقول نفس الكلام
بجد يعني جددوا ......اتعلموا حاجة جديدة تقولها و مش تستنوا الرئيس يقول او يعمل حاجة علشان تطبلوا ....شغلوا مخكم (لو فيه) و حاولوا تتطلعوا بأي افكار .....اقرأوا التاريخ و اتعلموا أي حاجة ...فضحوتنا و خليتوا الصيع برة قبل جوة يضحكوا علينا
أحلي حاجة في الحكاية بقي
ان كل بتوع الحزب الوطني يقولوا ايه
بسم الله الرحمن الرحيم – مع احترامنا لشخص البرادعي الا انه .........الخ
و ده في حد ذاته تقدم مذهل في شخصيتهم انهم عرفوا ان في حد محترم
الناس في الشارع
مالهمش دعوة حتي الان بكل اللي بيحصل و عجنة المطرة كفاية عليهم
علي السريع ولو مش تبع الموضوع :
وائل عباس صادروا منه الدي فيديهات اللي فيها افلام جابها معاه من برة ......نفسي اعرف مين اللي مسئول عن الملفات دي في الامن.
فاطمة : مدونة انا مش اعرفها بس مديرها فصلها من الشغل علشان كتبت تدوينة عن البرادعي ..... و واضح انها بنت ناس و محترمة لانها فعلا مش رضيت حتي تقول اسمه او اسم الشركة و ان كان برضه ده حقها و عموما أكيد هما اللي خسروا مش انتي
محافظ القاهرة : مشغول في معركته مع السلاب بدل ما يشوف خيبته القوية في الامطار اللي ساعتين منها بيخلوا القاهرة زي ما تكون ترعة ...بلد موظفين صحيح ....لا و اغبياء
انتظروا مقالتي في مجلة احنا كل شهر من الان بقي
تحياتي

1/25/2010

اضراب من أجل الحرية


تضامنا مع اضراب الاصدقاء المدونين في المغرب المدونة تتوقف لمدة اسبوع

الاصدقاء مضربين بسبب قمع حرية المدونين و انا معهم من مصر

نعم لحرية الرأي و التعبير في كل مكان في العالم


1/14/2010

انا الشعب غصب عن عين الشعب

كان بقالي فترة كبيرة أوي مقاطع اي انشطة و ندوات الا أنشطة الروتاري لحد ما رمتني رجلي لنقابة الصحفيين في ندوة الشبكة العربية عن تقريرها عن الانترنت في العالم العربي
الندوة لطيفة بشكل عام
الاول انا قابلت الاستاذة نوارة نجم لأول مرة و الاستاذ حسام الحملاوي برضه لأول مرة ...الاولي انا سمعت عنها من مدونتها و لأنها بنت فؤاد نجم طبعا و قبل ما تعملي بلوك من كام يوم بسبب انها مش عاجبها السادات و انا اعترضت طبعا و التاني انا شفت مدونته كام مرة و كنت متابعه من خلال التويتر قبل ما يعملي بلوك امبارح بس ما كنتش اعرف ان هو ده عرباوي اللي انا متابعه علي التويتر و كان فيه الاخ برضه كريم البحيري
بس اللي حصل بقي خلاني شوية أفكر
أول حاجة انا اتكلمت في نقطتين
الاولي : هي الناس بتطالب بالحرية في مصر و يقولوا احنا اتسحلنا و اتضربنا ...ماشي ...بس علشان انا اقدر ادافع عن حد بيقول انا مع الحرية لازم هو كمان يحترم حريتي حتي لو كانت في اني ضد غزة ...أو مؤيد للتطبيع مثلا.... بدون تخوين و ده هما مش قادرين يقبلوه .... وزي ما الاستاذة نوارة قالت في مدونتها هما حسوا بالتوتر لما انا اتكلمت في النقطة دي
الثانية : السيد جمال مبارك و دوشته و انا كتبت لمن لا يعلم ..انا و جمال مبارك و الاصلاح قبل كده و ليا موقف من السيد جمال مبارك
وشايف ان في تسطيح شديد جدا جدا لتناول حكاية جمال مبارك و ده بالنسبة ليا بيقضي علي موضوعية النقاش ...و ده له حديث طويل أوي
هما مشكلتهم الاساسية ضد التوريث ... و انا ضد التوريث لو هيحصل فعلا
لكن نسيب كل حاجة و نتفرغ لتقسيم الناس مين مع جمال و مين مش معاه و مين مع التوريث و مين لا
في ناس و انا بشوفهم كثير في كل حتة في الحزب و براه مؤيدين لجمال و ده حقهم برضه حتي لو غلط
الفكرة بقي هي اختطاف مصر
كريم البحيري قال انا بقابل ناس مش عارف هما ازاي مصدقين
لا هما الاغلبية و انت الاقلية ..... الناس اللي في مصر حاسة اه بفقر و ظلم او حتي لو راضية عن الاوضاع ...لكن في اجماع ان مش حضرتك و لا الحملاوي و لا نوارة البدائل ...لان اول حاجة انت بتتهمهم بعدم الوعي و ان انت اللي عارف الحقيقة
مش عارف كلامي يبدو مكرر و بديهي بس الحقيقة انا حاسس كل واحد بيختطف مصر لصالحه
و مفهوم النضال في الحقيقة انا بقيت مش فاهمه
اللي ضربوه في مظاهرة بقي زعيم
و اللي قعد شوية مع العمال و لف و اتسحل معاهم بقي مناضل عظيم زي جيفارا مثلا
في الحقيقة انا مش عندي تعريف لكلمة مناضل بس الفكرة الاساسية ان حتي الان مفيش بديل ...حتي البديل بتاعتهم قفلت
انا بقي مش هدافع عن اي حاجة غير اني مصري وبس و لما بشوف الناس دي ببقي فخور اني عضو في الحزب الوطتي لانه رغم كل عيوبه هو الافضل

علي السريع الي الاستاذة نوارة :
انا كلامي علي التويتر مش فيه اي اهانة و لكن فيه اختلاف علي فكرة تحفظك علي فكرة القانون
و الفيديو اللي حضرتك حطاه علي مدونتك ده لا يعبر عني اي حد او اي حاجة غير صاحبه
حكاية غزة :
الفيديو ده و ده و ده ممكن يكون فعلا بقي معبر عننا و انتي اكيد تعرفي الضيف اللي في الحلقة
و جروب عفوا غزة انا لست متضمان كان معمول قبل ضرب غزة ب 9 شهور تقريبا وكان عدد اعضائه 4 الاف عضو مش متضامنين مع غزة
و انا شخصيا كتبت عن حكاية غزة و الانسانية المزعومة و كتبت كمان عن لقائي مع بتوع حماس قبلها و رأيي واضح في القصة دي مش بس انا ...لا زملاء من كل المعارضة في مصر و بنختلف علي كل حاجة الا دي
انا عارف انك هترجعي في الاخر و مش هتقدري تكملي القراءة ...بس راجعو انتوا نفسكم شوية و بس مطلوب منكم شوية قبول للاخر
تحياتي

1/12/2010

ما بعد الرئيس مبارك


حكاية رئاسة الجمهورية اللي جننت الناس خلاص خلتني قعدت أفكر – مش اني ابقي رئيس طبعا – و لكن مين الرئيس ؟؟
هو ده السؤال اللي محتاج اجابة و اللي انا وصلت للسيناريو ده و في لحظة تجلي و تنظير مع صديقي أحمد سميح وصلنا ان غالبا ده اللي هيحصل
و خلينا كده نحط شوية حاجات ادام عيننا
الاول : الرئيس مبارك واضح تماما انه مش ناوي يتخلي عن الرئاسة لان اللي حواليه فهموه ان الشعب عايزه طول ما هو عايش ..يعني فكرة انه يتنحي دي او يعمل انتقال سلطة او اي كلام ده هي فكرة خزعبلاية تماما حتي و لو كان لجمال ابنه.
الثانية : ان في الحقيقة انا مش شايف – يمكن ضعف نظر عندي – اي اتجاه رسمي مباشر لدعم جمال مبارك و لكن اللي حاصل مجموعه من الشباب اللي معجب بيه –عادي- و مجموعة من الصحفيين و مطبلي السلطة و الموظفين اللي بينافقوا السلطة و اصدقائها و ابن الرئيس بقي له واجب حتي لو وصلت انه يبقي الرئيس.
نرجع للموضوع
الرئيس مش هيسيب الحكم الا بناء علي رغبة عليا من ربنا
و ساعتها هيقف الناس اللي هقولهم دول يتكلموا و يتفقوا :
فتحي سرور : رئيس مجلس الشعب
صفوت الشريف : رئيس مجلس الشوري و أمين عام الحزب الوطني
أحمد نظيف : رئيس مجلس الوزراء
زكريا عزمي : رئيس ديوان رئيس الجمهورية
جمال مبارك : نجل الرئيس و أمين السياسات في الحزب الوطني
المشير حسين طنطاوي : وزير الدفاع
اللواء عمر سليمان : رئيس جهاز المخابرات
بس خلاص
ناس هتقول حبيب العادلي فين و ناس هتقول فين رئيس اركان الجيش سامي عنان و مع كامل احترامي للكل هؤلاء ادوات قوية و ليسوا قوة في حد ذاتها
نيجي بقي للي هيحصل
أول حاجة هيتفقوا عليها هي الاجراءات العادية في اذاعة الخبر و مراجعة بعض القواعد الامنية الروتينية .
الجماعة دول لازم يخرجوا و هما متفقين بينهم علي اسم المرشح القادم للرئاسة
جمال مبارك أول واحد هيتباع في الليلة دي
قولوا ليه ؟؟؟
صفوت الشريف و فتحي سرور و ربما نظيف يدركون تماما ان جمال مبارك ان اصبح رئيس معناها انهم هيروحوا يقعدوا في البيت و يمكن يحب يعمل تطهير بقي و يقدمهم- أقصد الشريف و سرور - فدية وعربون محبة للشعب و يجيب رجاله من جهابذة السياسات
يعني هيبقي الاثنين دول عندهم اي حد الا جمال و خصوصا انه فقد قوته و ظهره اللي حاميه من ضرباتهم
المهم نبيع جمال مبارك علشان مين ؟؟؟
بصوا كده في القعدة هتلاقوا نظيف ينفع
ماله ؟؟؟ هادي و حلو و الامريكان بيحبوه و بتاع التكنولجيا و نقدر نقوله احنا حاميينك في المجلس و الحزب و هو راجل طيب و لا عمره كان عضو في حزب و لا يعرف المجلس ده كان فين لحد ما دخل الوزارة
الجيش بقي
اللواء عمر سليمان وفقا للمؤشرات العامة ليس علي وفاق مع السيد جمال مبارك دليلي :
الاول: حينما قال الرئيس مبارك ان فكرة الانتخابات الرئاسية التعددية كانت مرفوضة داخل الجيش
الثاني : خلال عزاء نجل شقيق السيد جمال مبارك كان السلام بينهما باردا جدا و اوضح مساحة كبيرة من الخلاف يمكن مشاهدتها في
الفيديو الخاص بجنازة نجل السيد علاء مبارك
الثالث : ان المؤسسة العسكرية في مصر مازالت تنظر الي ما يقوم به السيد جمال مبارك بكثير من الريبة و الحذر وفقا للنظريات القديمة في الامن والاستقرار و ضيقهم الشديد بأفكار رجال الاعمال ....راجعوا كيف تم السماح بخدمة GPS
و بالتالي الاستقرار الذي ستبحث عنه المؤسسة العسكرية سيكون غالبا ضد جمال مبارك وخصوصا انه بالنسبة لهم ليس لديه قوة تحميه
وأما سؤال لماذا لا يرشح السيد عمر سليمان نفسه ؟؟
اعتقد ان السيد عمر سليمان لا يريد ترشيح نفسه لاسباب كثيرة منها ان طبيعة الدور الذي لعبه هو دور المستشار المخلص و الامين و الحامي لاستقرار مصر و هو ما يريد ان يظل فيه دائما اي ما كان الشخص الموجود والذي لا يجب ان يكون من دور أولاده كما ان لو كان لديه النية لكان ظهر و عرفته الناس حتي يبدأ في اكتساب شعبية ولو محدودة

هنا ستلتقي المصالح ضد جمال مبارك الاستقرار و الامن القومي بالمفهوم التقليدي مع الحرس القديم من اصحاب ايضا المدارس القديمة في السياسة و النتيجة معروفة
سيبقي فقط السيد زكريا عزمي و الذي اتصور انه سيحاول ان يكون علي الحياد في انتظار اللحظة المناسبة ليعلن المركب التي سيركبها و التي بالتأكيد ستنطلق نحو الرئاسة و ان كان هو الوحيد الذي يبدو خاسرا من عدم وجود جمال في الحكم لان وجود اي رئيس اخر ربما يطيح به هو فقط خارج ديوان الرئاسة
اذن المعادلة هي نظيف – أو اي رئيس وزراء موجود – ليس حبا في شخصه و لكن كرها في جمال مبارك و الذي اصبح بلا قوة حقيقية تحميه
و النتيجة محسومة
و أتوقع ان يحدث الاتي في مرحلة ما بعد اعلان تلك الترتيبات:
سيناريو الفوضي الاول :
فوضي عادية من بعض الجياع و الحاقدين و ستكون في بعض المناطق المحدودة و التي ليست تحت السيطرة المباشرة للامن مثل المناطق النائية الغنية و ستقل تلك الفوضي بشكل سريع و ستبدأ من 15 % الي 10% و تقل خلال يومين الي اسبوع علي الاكثر بعد استقرار الامور و لن يصاحبها تأثيرات سياسية و ربما يصاحبها خروج لحركات المعارضة الضعيفة مثل كفاية او بعض الشباب العبيط بتوع الانترنت
سيناريو الفوضي الثاني
و هو خروج الاخوان بالاساس او خروج قوي معارضة حقيقية متحالفة و هو ما سيمثل مرحلة فوضي من 20% الي 40% و اكثر من ذلك سيكون سيتدخل الجيش اذا وصلت الامور لهذا الحد
و استبعد ان يتم هذا السيناريو حيث ان مطلب القوي جميعا هو الا يأتي جمال مبارك ..اما غيره فيمكن الاتفاق معه او علي الاقل ستعتبر تلك القوي ان نجاحها في عدم ترشيح جمال مبارك
عوامل اخري مؤثرة :
عمرو موسي : مجرد نزول عمرو موسي من مكتبه و وقوفه أمام قناة الجزيرة ليعلن انه مرشح رئاسة سيجعله كذلك و ستظهر رغبة كبيرة من الناس في ان يكون مرشح
البرادعي : ينطبق عليه نفس القول و ان كنت اتصور انه سيحدث وفاق بينهم بحيث يتحدوا و ستقف ورائهم قوي المعارضة التقليدية من الوفد و الجبهة او دعاة التغيير من عواجيز السياسية مثل الدكتور يحيي الجمل و الناس بتوع الفضائيات و مطالب دستور جديد و الكلام الفشنك
اتصور ان هذا هو السيناريو و لا يمكنني التنبؤ بمن سينجح بين نظيف و البرادعي مثلا لان مرشح الحزب الوطني يستند الي قوة مستفيدة جدا من الاستقرار و الوضع الحالي و الي قوة الحزب بينما سيكون الثاني مستند الي شرعية الرغبة الحقيقية في التغيير والتي كلما صدقت سيكون التغيير قادم قوي
دعابة : بعد كل ده نتيجة الانتخابات هتتزور و تطلع لصالح السيد جمال مبارك و يبقي هو الرئيس برضه و كل سنة و انتوا طيبين لأن في ناس مقتنعة تماما انه الرئيس تماما في حين ان الامر كله في علم الغيب و الله أعلم

بسرعة : صديقي أحمد سميح منذ انشاء الفيس بوك عمل جروب اسمه هتعمل ايه لما تعرف ان الرئيس مبارك مات