5/28/2007

انا استقلت


أنا استقلت
من حوالي 10 ايام وفي هدوء اعلنت استقالتي من شركة الشباب اللي بيقولوا علي نفسهم ليبرالي

القرار ده اتأخر لسبب اني مش متعود انسحب من أي نشاط ولاني كنت واخد قرار بالاستمرار من الاجل الاصلاح
لكن عموما اللي حصل حصل
كنت ناوي اقعد ساكت لحد لما لقيت واحد عامل جروب وبيقول اتحاد الشباب الليبرالي " انت ليبرالي بجد ولا كده كده علي العموم هنشوف ونعرف"
كل اللي فيه 7 اصلا ونصهم فاكرين انهم عباقرة البلد اللي هيجيبوا الديب من ذيله
الحقيقة الكلمة مستفزة
هما نصبوا نفسهم كهنة الليبرالية ودراويشها
واللي مش معانا يبقي من الضالين في حين انه في جروب تاني للناس الليبرالية فيه 500مصري لا بتوع سفر ولا بتوع سبوبة
انا مش هقول حاجة لان اللي عندي قولته قبل كده هنا وممكن ازيد عليه ان هناك بعض الفاشلين والمطرودين من منظمات المجتمع المدني
و الاحزاب المحترمة لقوا في الموضوع (سبوبة) للسفر وللتمويل وانهم لما يحولوا الاتحاد لشركة هتبقي اسهل

وكمان شوية كائنات نتية( لا تظهر الا في التصويت علي الانترنت) تلاقيها مع الناس بمنطق الموافق علي ما يقال يرفع يده يقوم كام واحد يرفعوا ايدهم علي وعد بحتة من التورتة اللي هتكبر لما الشركة تشتغل والسوق يمشي وخصوصا ان سوق الكلام في الديمقراطية والليبرالية والاصلاح والشباب سوق حلو وواعد للشركات والدكاكين اللي فتحت جديد واللي هتفتح.
انا شخصيا لما وقعت علي البيان التأسيسي كان بهدف محاولة اقامة أي نشاط لنشر الفكر الليبرالي بين الشباب وتوسيع قاعدة الشباب الليبراليين في مصر مش علشان شركة وابقي رجل اعمال بدل ما انا عاطل

طبعا هي بقت شركة بعد ما ده الشكل القانوني اللي وافق عليه الشركاء
علشان السبوبة تبقي بعيد عن الجمعيات وقانونها اللي دمه ثقيل وعلشان يبقي كله في
السليم ......السليييييم

مش في نيتي اني اعمل كيان موازي و ابقي زي الاخوة الناصريين والقومجية والشيوعين انا مازالت عند ليبراليتي الحمد لله ولم اصبح رجل اعمال من بتوع شركة الشباب الليبرالي المصري

هناك تعليقان (2):

غير معرف يقول...

أولا يا محمود بيه ، انت من حقك انك تستقيل و تعبر عن ده زى ما انت عايز ، لكن مع احترامي الشديد لأفكارك ، يعني ايه كيان موازي؟
هو الاتحاد ده كيان أصلا ، و لو فيه حاجة موازية ليه حتمشي زى ما هو ماشي يعني؟ أفتكر الموضوع يستاهل، خصوصا لو ان الناس الجديدة كانت ليبرالية بجد

واحد من الناس

ابو نظارة يقول...

انا مش فاهم حاجة ممكن حضرتك توضح أكثر علشان انا لسة جي النت جديد
مين هي شركة الشباب الليبرالي
وايةهي المنتجات اللي بتبيعها
وياتري منتجاتها هتتباع في كارفور ولا هايبر ماركت ولا مترو ماركت
ارجوك قولي ارجوك
علشان نفسي اشتري منتج يكون كدة ليبرالي في حر الصيف اللي مولع دة