1/07/2009

حكاية غزة و الانسانية المزعومة


كلمة انسانية كما وجدت معناها في ويكيبيديا : حركة فلسفية، كانت تدعوا إلى إعادة الكرامة إلى القيمة الإنسانية، كانت ترجح التفكير العقلاني، وأكدت على تفوق الإنسان بذاته وليس عن طريق القِوى التي لا تخضع لمنطق العقل....فكروا فيها شوية كده ..
كارثة انسانية كلمة ترددت كثير في الفترة الاخيرة مربوطة بقصة غزة
وفي الحقيقة انني حاولت ان اتعاطف مع هذه المقولة فيما يخص غزة فشلت.... مش قادر اتعاطف
اصل لما صخرة جبل تقع علي الناس او يحصل زلزال او فيضان او حتي قطار يتقلب او يتحرق دي كوارث طبيعية او انسانية و حتي لو في شق اهمال انساني لكن هو اهمال مش سياسة معروف مقدماتها و نتائجها لكن دلوقتي ...
ناس اختارات حكومة بتقول انها جاية علشان تعلن الحرب علي اسرائيل و ناس قررت انها تدخل الحرب مع عدو مش معروف عنه انه لما بيحارب بيبقي ذوق و اخلاق
يعني لا اسرائيل جديدة و لا غزة وقع علي دماغهم نيزك
دي ناس كلها قررت انها تدخل في حرب ...
و محدش يقولي ما هو اساسا في ظل السلطة مفيش سلام لاني هقوله اقرا التاريخ من عند اوسلو و انت جاي
و بعدين يقولك العدو بيضرب المدارس و المستشفيات و الجوامع لكن محدش بيقول ان اسرائيل بتقدم للعالم صورة الشاب الشطور بتاع المقاومة ..يحدف البمبة و القمر الصناعي مصوره و يجري يدخل في أي مكان من دول الطيارة تجيبه طبعا و تضربه ...مكان ما يدخل بقي اصله يعني مش هيحدف البمبة واسرائيل هتسكت
الخلاصة اللي انا عايز اقولها مفيش انسانية في الموضوع بقي دي ناس قررت انها عايزة الحرب و لو الشعب الفلسطيني عايز السلام يخرج و يقول للي قاعدين يديروا الحرب من فنادق دمشق ...
لا مش عايزين الحرب او عايزين الحرب
الغريب بقي ان الاخوة المصريين اللي عايزين مصر تفتح المعابر او تعلن الحرب علي اسرائيل كل ما تقول لواحد يقولك ..انسانيا
انت مش انسان يا اخي ؟؟؟!!!!!!
طيب و الانسان في دارفور مثلا و الانسان المعتقل في مصر وفي وسوريا ...
و الحكومة ما صدقت ...
ما لما نتظاهر علشان غزة ..هنروح ننام في الاخر ..و نطلع شوية كبت بدل ما نتظاهر علشان رغيف العيش ولا العبارة
يعني حكاية الانسانية انا مش داخلة دماغي اوي
المهم اننا يعني مش مؤمنين بالانسانية اوي كده ..احنا تاريخنا في حكاية الانسانية دي عرة – بدون نقط - اوي
يعني احنا جوة مصر مع بعض ولا نعرف أي حاجة في الانسانية دي و مش محتاج اذكر امثلة
و لما حصلت احداث 11 سبتمبر مثلا مش قولنا انسانية ...
لا احنا قولنا سياسة امريكا هي السبب و لما الاعصار بيضربها تلاقي الناس تقولك ..ده غضب ربنا
هو احنا الانسانية لكن الناس التانية كفرة ولاد بوبي
ومحدش يقولي شعب غلبان ولا حول ولا قوة علي بتوع غزة لو هو كده يبقي يستسلم اه ....
يستسلم ... عادي يعني ما هو انا يا أد الضرب و استحمل يا اسكت لكن احارب علي اساس اني هرمي بلايا علي مصر ؟؟؟
اللي عايز يناضل... يناضل من جيبه مش من جيب الناس التانية....... واللي يجي بعد كده خير.
مينفعش اقرر اطلع الصحراء اعمل سفاري اسبوع و بعدين اخد زاد ليومين واعتمد ان اخويا هيسيب شغله و يجي يجيب باقي الزاد و اقوله اصل انا بموت.... رغم انه قالي خد معاك حاجتك علشان انا مش فاضي
ما هو يعني مش طريقة انا عارف طبعا اننا هنقول اسرائيل بقي و الوحشية بس يعني ده الغباء بعينه
خلوني اسال شوية اسئلة
هو ليه احنا بس اللي بيحصلنا ده من خمسين سنة ومش بنتعلم ؟؟؟
و ليه برضه الرئيس الوحيد اللي بيتعبروه خاين هو الرئيس الوحيد في كل اللي بيشتموه اللي ارضه محررة ؟؟
و علي العكس ...الرئيس اللي الجماهير الذكية شايلة صورته مات و مصر محتلة مش بس مصر لا كل دول المواجهة و كان بسببه
بالذمة دي ناس حد يسمع كلامها و يمشي وراها ؟؟؟
و مبارك اللي حتي لو اختلف الناس حول سياسته الداخلية لكن هو الوحيد اللي حارب بجد في كل الموجودين حارب حارب يعني و تدريبات و خطة مش شوية بمب من مخبأ و قناة فضائية تعمله زعيم
يعني لو نشغل دماغنا شوية هنعرف ان غزة مش محتاجة دعم غزة محتاجة تفكير لمدة ربع ساعة نفكر ربع ساعة و الله و تبقي الدنيا زي الفل و نسأل سؤال ...مش يمكن احنا مش صح عالطول الخط ؟؟؟
كلامي هيزعل الناس انا عارف بس انا معلش زعلان برضه بس بطريقتي .

هناك 3 تعليقات:

غير معرف يقول...

ممكن بس افهم حاجة وحدة
ازاي يعني شعب غزة او الفلسطينين اختارو الحرب ؟؟؟؟

Mahmoud Ibrahem يقول...

هما لما اختاروا حماس أختاروها علشان هي منهجها الحرب و المقاومة
يعني اختاروا المنهج ده

Nermeen يقول...

الكلام فيه مغالطات كتير :)
اختيار حماس مكانش تحديدا اختيار "الحرب ضد السلام".. كان اختيار "المقاومة ضد الموت بهدوء"

والأهم ان حتى لما تختار المقاومة فماحدش قال ان الحروب بلا قوانين.. فيه اتفاقيات بالفعل تمنع الهجوم على المواقع المدنية في الحرب.. ناهيك ان الهجوم من محتل أساسا

فيه انسانية في الموضوع طبعا.. ومافيش مايبرر قتل الأطفال بحجة ان البالغين اختاروا المقاومة (هي مقاومة مش حرب)

ماحدش في غزة اختار المقاومة على سبيل الهواية.. الحرب كلها اتفرضت عليهم.. والاحتلال كله اتفرض.

الإنسان في دارفور والمعتقلين في مصر وسوريا وغيرهم قضايا انسانية قطعا.. مش فاهمة ايه وجه التناقض انك تدعم فتح المعبر وتكون ضد الاعتقالات وضد مذابح دارفور في نفس الوقت.. الأقرب للمنطق وللواقع ان اللي ضد دا ضد الباقيين

فيه اهتمام زيادة بغزة عن دارفور؟؟ أيوة طبعا.. أضعاف

انا باسميه الجزء القبلي مش الإنساني.. الجزء المقموص ان عربي في غزة يتقتل من صهيوني وأقل غضبا لما بريء ومسلم يتقتل من مسلم تاني.. الغضب بيقل شوية لأن القاتل والقتيل الاتنين "تبعنا" مافيش كرامة تنقح ف الموضوع.. خصوصا ان القاتل مسلم عربي والقتيل مسلم أفريقي يعني القاتل أقرب لنا شوية

دا يقلل من كون غزة قضية انسانية؟؟ لأ هو فعليا يقلل من انسانية المهتم بغزة دون دارفور.. ويبقى الاتنين قضايا انسانية من الدرجة الأولى

نفس الكلام في باقي القضايا.. ان حد يتعاطف مع قضية انسانية دون غيرها دا يقلل من انسانيته ومايقللش من انسانية القضية نفسها.. ومافيش حاجة اسمها "هو اللي جابه لنفسه".. دا منطق أناني جدا.. ومافيش بردو حاجة اسمها "ماهو فيه ناس متعاطفة مع قضايا دون أخرى" دا منطق بيبرر القسوة

ومن الإنسانية هنا اننا نفتح المعبر.. ع الأقل بما ان حدودنا مع حكومة السودان (القاتل في حالة دارفور) مفتوحة يبقى ع الأقل نفتحها بالمثل مع الضحية في حالة غزة