2/27/2010

البرادعي .....سياسة في بلد غاب عنها السياسيين

مساء الخير
بقالي كثير أوي مش كتبت حاجة لأن عندي ظروف منيلة بستين نيلة و مش في المووود خالص
بس يالا ان شاء الله خير
الله ما أجعله خير صحيت لقيت البلد مقلوبة علشان البرادعي جاي
المهم موضوع البرادعي ده سياسيا لطيف اوي اوي اوي .... و كمان أوي
خلينا أولا نبعد شوية عن حكاية رئاسة الجمهورية
مرشحين رئاسة الجمهورية رسميا مش هتكلم عنهم الا لما يتقفل باب الترشيح في 2011 و دي حقيقة كده بصفتي خبرة في الانتخابات
يعني مفيش مرشحين رسميين للانتخابات الا لما يتقفل باب الترشيح و طالما بتوع الحزب الوطني اللي بيظهروا في الفضائيات و مش عندهم غير كلمة واحدة .... الشرعية الدستورية و القانونية
يعني جميل جميل ...الشرعية الدستورية و القانونية بتقول بقي ان رئيس الجمهورية الحالي هو الرئيس مبارك و حتي غلق باب الترشيح في 2011
نيجي بقي للسياسة .... وطالما هنتكلم في السياسة يبقي بتوع الحزب الوطني اللي ارفوا امي في الفضائيات يطلعوا برة لانهم فعلا مش عارفين يتصرفوا
لايصين لوصة البلجيكي اللي راح السنغال
هما معذورين ....بيخاوفوا ..... و اللي يخاف ميلعبش و اللي يلعب ما يخافش ... و هنقول بقي علي تأثير الحكاية علي كل القوي السياسية في مصر
بس الاول نتكلم عن البرادعي نفسه
الراجل بصراحة محترم جدا و حاجة مشرفة ان مصر فيها ناس زي الراجل ده و له مطالب مشروعة و من حقه انه يناضل علشانها
و أكثر حاجة عجباني فيه انه هادي و واخد الامور ببساطة و مش بيتكلم عن أشخاص ...بيتكلم عن مطالب محددة و كمان عنده فكرة انه يلم الناس حواليه و دي حاجة مهمة أوي لان دي باختصار السياسة
يعني ببساطة الراجل داخل معركة اعتقد انه حتي الان هو ماشي فيها كويس و ان ادائه و مطالبه هايلين و بصراحة هو عامل زي المهندس اللي جه يوري السباكين انهم مش فاهمين أي حاجة في تركيب المواسير
بس خليني اقول ملاحظتين بقي
الاولي : ان النشطاء الموجودين جنب البرادعي و بيقابلوه نشطاء الانترنت و الفضائيات هما في الاخر لسه مش ليهم شعبية و لا قواعد كثير و في منهم لو فكر ينزل انتخابات حتي لو نظيفة مش ياخد غير صوته و بالتالي سيكون التحدي الاساسي للبرادعي هو الخروج من دائرة الجماعة دول و الاحتكاك بالناس بجد و توسيع قاعدته الشعبية الحقيقية
الثانية : ان اساسا الناس دي اللي حواليه برضه هما مطاريد الاحزاب و الناس اللي ضد النظام كله علي طول الخط و دول فيهم عيب سياسي خطير و ناسف وهو انهم مش بيرضوا باي صيغ توافقية و عندهم قناعة ( انا مش عارف جابوها منين ) انهم مبعوثي الديمقراطية و تخليص الشعب من الظلم و القهر و ده يعني بصراحة حاجة كده تخليهم برضه ناس فكسانة
و انا هنا بتكلم عن كل الجوقة اللي جنبه مش عنه ....الراجل كويس و بيسمع و كلامه كويس و عاقل حتي الان ..
المعارضة الرسمية
و دول بقي سياسيين لطاف ودول أكثر ناس هتستفيد من اللي هيحصل
لان لو البرادعي نجح في أي مطالب هما قوي شرعية و أقوي منه بالخبرة و الشرعية و يقدروا يأخدوا مكاسب كويسة ولو البرادعي فشل فهما كده كده باعوه و هياخدوا برضه صفقة حلوة مع الحكومة ...هتفضل مشكلة الانفصاليين من الاحزاب دي و هي هتبقي خسارتهم الوحيدة و اعتقد اكثر حزب معرض للانقسام حول القضية دي ممكن يكون الوفد لو التسريبات المنشورة صحيحة
رفعت السعيد كمان رسميا مش ممكن يكون عاقل
هو ساب كل الكلام و اللي بيحصل و متضايق ان ضمن وفد زيارة بيت البرادعي كان الكتاتني و اعتبر ان ده رهان علي التيار الاسلامي و تقريبا لو قالوا للتعيس ده ان في زلازل حصل في اليابان هيقولهم بسبب دعوات الاخوان المسلمين ..... يالا زمن .......ولا بلاش
الحزب الوطني (نجوم الفضائيات)
مجدي الدقاق و من لف لفه
دول بقي يا عيني صعبانين عليا اوي مجدي الدقاق بيتكلم عن الاستقرار و الفوضي اللي ممكن تخلقها مثل هذه الحركات اراهن انه لو جبنا حديث ليه من 2005 مثلا و ركبناه علي النهاردة هتلاقيه بيقول نفس الكلام
بجد يعني جددوا ......اتعلموا حاجة جديدة تقولها و مش تستنوا الرئيس يقول او يعمل حاجة علشان تطبلوا ....شغلوا مخكم (لو فيه) و حاولوا تتطلعوا بأي افكار .....اقرأوا التاريخ و اتعلموا أي حاجة ...فضحوتنا و خليتوا الصيع برة قبل جوة يضحكوا علينا
أحلي حاجة في الحكاية بقي
ان كل بتوع الحزب الوطني يقولوا ايه
بسم الله الرحمن الرحيم – مع احترامنا لشخص البرادعي الا انه .........الخ
و ده في حد ذاته تقدم مذهل في شخصيتهم انهم عرفوا ان في حد محترم
الناس في الشارع
مالهمش دعوة حتي الان بكل اللي بيحصل و عجنة المطرة كفاية عليهم
علي السريع ولو مش تبع الموضوع :
وائل عباس صادروا منه الدي فيديهات اللي فيها افلام جابها معاه من برة ......نفسي اعرف مين اللي مسئول عن الملفات دي في الامن.
فاطمة : مدونة انا مش اعرفها بس مديرها فصلها من الشغل علشان كتبت تدوينة عن البرادعي ..... و واضح انها بنت ناس و محترمة لانها فعلا مش رضيت حتي تقول اسمه او اسم الشركة و ان كان برضه ده حقها و عموما أكيد هما اللي خسروا مش انتي
محافظ القاهرة : مشغول في معركته مع السلاب بدل ما يشوف خيبته القوية في الامطار اللي ساعتين منها بيخلوا القاهرة زي ما تكون ترعة ...بلد موظفين صحيح ....لا و اغبياء
انتظروا مقالتي في مجلة احنا كل شهر من الان بقي
تحياتي

هناك 3 تعليقات:

غير معرف يقول...

ما انت حلو اهو امال مش باين عليك ليه

Mahmoud Ibrahem يقول...

الحلو بيتاكل و الملح بيتدق ..يا ملح
و نفسي الناس تحط اسمها بس و يبقي عندهم الشجاعة
و عموما يعني مش مستني واحد زيك يقول تقييمه لشخصي و ايه اللي يبان عليا و ايه اللي مش يبان

saico يقول...

asle ya 7oka ....kalam gameel