اضراب من أجل الحرية

تضامنا مع اضراب الاصدقاء المدونين في المغرب المدونة تتوقف لمدة اسبوع

الاصدقاء مضربين بسبب قمع حرية المدونين و انا معهم من مصر

نعم لحرية الرأي و التعبير في كل مكان في العالم

انا الشعب غصب عن عين الشعب

كان بقالي فترة كبيرة أوي مقاطع اي انشطة و ندوات الا أنشطة الروتاري لحد ما رمتني رجلي لنقابة الصحفيين في ندوة الشبكة العربية عن تقريرها عن الانترنت في العالم العربي
الندوة لطيفة بشكل عام
الاول انا قابلت الاستاذة نوارة نجم لأول مرة و الاستاذ حسام الحملاوي برضه لأول مرة ...الاولي انا سمعت عنها من مدونتها و لأنها بنت فؤاد نجم طبعا و قبل ما تعملي بلوك من كام يوم بسبب انها مش عاجبها السادات و انا اعترضت طبعا و التاني انا شفت مدونته كام مرة و كنت متابعه من خلال التويتر قبل ما يعملي بلوك امبارح بس ما كنتش اعرف ان هو ده عرباوي اللي انا متابعه علي التويتر و كان فيه الاخ برضه كريم البحيري
بس اللي حصل بقي خلاني شوية أفكر
أول حاجة انا اتكلمت في نقطتين
الاولي : هي الناس بتطالب بالحرية في مصر و يقولوا احنا اتسحلنا و اتضربنا ...ماشي ...بس علشان انا اقدر ادافع عن حد بيقول انا مع الحرية لازم هو كمان يحترم حريتي حتي لو كانت في اني ضد غزة ...أو مؤيد للتطبيع مثلا.... بدون تخوين و ده هما مش قادرين يقبلوه .... وزي ما الاستاذة نوارة قالت في مدونتها هما حسوا بالتوتر لما انا اتكلمت في النقطة دي
الثانية : السيد جمال مبارك و دوشته و انا كتبت لمن لا يعلم ..انا و جمال مبارك و الاصلاح قبل كده و ليا موقف من السيد جمال مبارك
وشايف ان في تسطيح شديد جدا جدا لتناول حكاية جمال مبارك و ده بالنسبة ليا بيقضي علي موضوعية النقاش ...و ده له حديث طويل أوي
هما مشكلتهم الاساسية ضد التوريث ... و انا ضد التوريث لو هيحصل فعلا
لكن نسيب كل حاجة و نتفرغ لتقسيم الناس مين مع جمال و مين مش معاه و مين مع التوريث و مين لا
في ناس و انا بشوفهم كثير في كل حتة في الحزب و براه مؤيدين لجمال و ده حقهم برضه حتي لو غلط
الفكرة بقي هي اختطاف مصر
كريم البحيري قال انا بقابل ناس مش عارف هما ازاي مصدقين
لا هما الاغلبية و انت الاقلية ..... الناس اللي في مصر حاسة اه بفقر و ظلم او حتي لو راضية عن الاوضاع ...لكن في اجماع ان مش حضرتك و لا الحملاوي و لا نوارة البدائل ...لان اول حاجة انت بتتهمهم بعدم الوعي و ان انت اللي عارف الحقيقة
مش عارف كلامي يبدو مكرر و بديهي بس الحقيقة انا حاسس كل واحد بيختطف مصر لصالحه

و مفهوم النضال في الحقيقة انا بقيت مش فاهمه
اللي ضربوه في مظاهرة بقي زعيم
و اللي قعد شوية مع العمال و لف و اتسحل معاهم بقي مناضل عظيم زي جيفارا مثلا
في الحقيقة انا مش عندي تعريف لكلمة مناضل بس الفكرة الاساسية ان حتي الان مفيش بديل ...حتي البديل بتاعتهم قفلت
انا بقي مش هدافع عن اي حاجة غير اني مصري وبس و لما بشوف الناس دي ببقي فخور اني عضو في الحزب الوطتي لانه رغم كل عيوبه هو الافضل

علي السريع الي الاستاذة نوارة :
انا كلامي علي التويتر مش فيه اي اهانة و لكن فيه اختلاف علي فكرة تحفظك علي فكرة القانون

و الفيديو اللي حضرتك حطاه علي مدونتك ده لا يعبر عني اي حد او اي حاجة غير صاحبه
حكاية غزة :
الفيديو ده و ده و ده ممكن يكون فعلا بقي معبر عننا و انتي اكيد تعرفي الضيف اللي في الحلقة
و جروب عفوا غزة انا لست متضمان كان معمول قبل ضرب غزة ب 9 شهور تقريبا وكان عدد اعضائه 4 الاف عضو مش متضامنين مع غزة
و انا شخصيا كتبت عن حكاية غزة و الانسانية المزعومة و كتبت كمان عن لقائي مع بتوع حماس قبلها و رأيي واضح في القصة دي مش بس انا ...لا زملاء من كل المعارضة في مصر و بنختلف علي كل حاجة الا دي

انا عارف انك هترجعي في الاخر و مش هتقدري تكملي القراءة ...بس راجعو انتوا نفسكم شوية و بس مطلوب منكم شوية قبول للاخر

تحياتي

ما بعد الرئيس مبارك

حكاية رئاسة الجمهورية اللي جننت الناس خلاص خلتني قعدت أفكر – مش اني ابقي رئيس طبعا – و لكن مين الرئيس ؟؟
هو ده السؤال اللي محتاج اجابة و اللي انا وصلت للسيناريو ده و في لحظة تجلي و تنظير مع صديقي أحمد سميح وصلنا ان غالبا ده اللي هيحصل
و خلينا كده نحط شوية حاجات ادام عيننا
الاول : الرئيس مبارك واضح تماما انه مش ناوي يتخلي عن الرئاسة لان اللي حواليه فهموه ان الشعب عايزه طول ما هو عايش ..يعني فكرة انه يتنحي دي او يعمل انتقال سلطة او اي كلام ده هي فكرة خزعبلاية تماما حتي و لو كان لجمال ابنه.
الثانية : ان في الحقيقة انا مش شايف – يمكن ضعف نظر عندي – اي اتجاه رسمي مباشر لدعم جمال مبارك و لكن اللي حاصل مجموعه من الشباب اللي معجب بيه –عادي- و مجموعة من الصحفيين و مطبلي السلطة و الموظفين اللي بينافقوا السلطة و اصدقائها و ابن الرئيس بقي له واجب حتي لو وصلت انه يبقي الرئيس.
نرجع للموضوع
الرئيس مش هيسيب الحكم الا بناء علي رغبة عليا من ربنا
و ساعتها هيقف الناس اللي هقولهم دول يتكلموا و يتفقوا :
فتحي سرور : رئيس مجلس الشعب
صفوت الشريف : رئيس مجلس الشوري و أمين عام الحزب الوطني
أحمد نظيف : رئيس مجلس الوزراء
زكريا عزمي : رئيس ديوان رئيس الجمهورية
جمال مبارك : نجل الرئيس و أمين السياسات في الحزب الوطني
المشير حسين طنطاوي : وزير الدفاع
اللواء عمر سليمان : رئيس جهاز المخابرات
بس خلاص
ناس هتقول حبيب العادلي فين و ناس هتقول فين رئيس اركان الجيش سامي عنان و مع كامل احترامي للكل هؤلاء ادوات قوية و ليسوا قوة في حد ذاتها
نيجي بقي للي هيحصل
أول حاجة هيتفقوا عليها هي الاجراءات العادية في اذاعة الخبر و مراجعة بعض القواعد الامنية الروتينية .
الجماعة دول لازم يخرجوا و هما متفقين بينهم علي اسم المرشح القادم للرئاسة
جمال مبارك أول واحد هيتباع في الليلة دي
قولوا ليه ؟؟؟
صفوت الشريف و فتحي سرور و ربما نظيف يدركون تماما ان جمال مبارك ان اصبح رئيس معناها انهم هيروحوا يقعدوا في البيت و يمكن يحب يعمل تطهير بقي و يقدمهم- أقصد الشريف و سرور - فدية وعربون محبة للشعب و يجيب رجاله من جهابذة السياسات
يعني هيبقي الاثنين دول عندهم اي حد الا جمال و خصوصا انه فقد قوته و ظهره اللي حاميه من ضرباتهم
المهم نبيع جمال مبارك علشان مين ؟؟؟
بصوا كده في القعدة هتلاقوا نظيف ينفع
ماله ؟؟؟ هادي و حلو و الامريكان بيحبوه و بتاع التكنولجيا و نقدر نقوله احنا حاميينك في المجلس و الحزب و هو راجل طيب و لا عمره كان عضو في حزب و لا يعرف المجلس ده كان فين لحد ما دخل الوزارة
الجيش بقي
اللواء عمر سليمان وفقا للمؤشرات العامة ليس علي وفاق مع السيد جمال مبارك دليلي :
الاول: حينما قال الرئيس مبارك ان فكرة الانتخابات الرئاسية التعددية كانت مرفوضة داخل الجيش
الثاني : خلال عزاء نجل شقيق السيد جمال مبارك كان السلام بينهما باردا جدا و اوضح مساحة كبيرة من الخلاف يمكن مشاهدتها في الفيديو الخاص بجنازة نجل السيد علاء مبارك
الثالث : ان المؤسسة العسكرية في مصر مازالت تنظر الي ما يقوم به السيد جمال مبارك بكثير من الريبة و الحذر وفقا للنظريات القديمة في الامن والاستقرار و ضيقهم الشديد بأفكار رجال الاعمال ....راجعوا كيف تم السماح بخدمة GPS
و بالتالي الاستقرار الذي ستبحث عنه المؤسسة العسكرية سيكون غالبا ضد جمال مبارك وخصوصا انه بالنسبة لهم ليس لديه قوة تحميه
وأما سؤال لماذا لا يرشح السيد عمر سليمان نفسه ؟؟
اعتقد ان السيد عمر سليمان لا يريد ترشيح نفسه لاسباب كثيرة منها ان طبيعة الدور الذي لعبه هو دور المستشار المخلص و الامين و الحامي لاستقرار مصر و هو ما يريد ان يظل فيه دائما اي ما كان الشخص الموجود والذي لا يجب ان يكون من دور أولاده كما ان لو كان لديه النية لكان ظهر و عرفته الناس حتي يبدأ في اكتساب شعبية ولو محدودة

هنا ستلتقي المصالح ضد جمال مبارك الاستقرار و الامن القومي بالمفهوم التقليدي مع الحرس القديم من اصحاب ايضا المدارس القديمة في السياسة و النتيجة معروفة
سيبقي فقط السيد زكريا عزمي و الذي اتصور انه سيحاول ان يكون علي الحياد في انتظار اللحظة المناسبة ليعلن المركب التي سيركبها و التي بالتأكيد ستنطلق نحو الرئاسة و ان كان هو الوحيد الذي يبدو خاسرا من عدم وجود جمال في الحكم لان وجود اي رئيس اخر ربما يطيح به هو فقط خارج ديوان الرئاسة
اذن المعادلة هي نظيف – أو اي رئيس وزراء موجود – ليس حبا في شخصه و لكن كرها في جمال مبارك و الذي اصبح بلا قوة حقيقية تحميه
و النتيجة محسومة
و أتوقع ان يحدث الاتي في مرحلة ما بعد اعلان تلك الترتيبات:
سيناريو الفوضي الاول :
فوضي عادية من بعض الجياع و الحاقدين و ستكون في بعض المناطق المحدودة و التي ليست تحت السيطرة المباشرة للامن مثل المناطق النائية الغنية و ستقل تلك الفوضي بشكل سريع و ستبدأ من 15 % الي 10% و تقل خلال يومين الي اسبوع علي الاكثر بعد استقرار الامور و لن يصاحبها تأثيرات سياسية و ربما يصاحبها خروج لحركات المعارضة الضعيفة مثل كفاية او بعض الشباب العبيط بتوع الانترنت
سيناريو الفوضي الثاني
و هو خروج الاخوان بالاساس او خروج قوي معارضة حقيقية متحالفة و هو ما سيمثل مرحلة فوضي من 20% الي 40% و اكثر من ذلك سيكون سيتدخل الجيش اذا وصلت الامور لهذا الحد
و استبعد ان يتم هذا السيناريو حيث ان مطلب القوي جميعا هو الا يأتي جمال مبارك ..اما غيره فيمكن الاتفاق معه او علي الاقل ستعتبر تلك القوي ان نجاحها في عدم ترشيح جمال مبارك
عوامل اخري مؤثرة :
عمرو موسي : مجرد نزول عمرو موسي من مكتبه و وقوفه أمام قناة الجزيرة ليعلن انه مرشح رئاسة سيجعله كذلك و ستظهر رغبة كبيرة من الناس في ان يكون مرشح
البرادعي : ينطبق عليه نفس القول و ان كنت اتصور انه سيحدث وفاق بينهم بحيث يتحدوا و ستقف ورائهم قوي المعارضة التقليدية من الوفد و الجبهة او دعاة التغيير من عواجيز السياسية مثل الدكتور يحيي الجمل و الناس بتوع الفضائيات و مطالب دستور جديد و الكلام الفشنك
اتصور ان هذا هو السيناريو و لا يمكنني التنبؤ بمن سينجح بين نظيف و البرادعي مثلا لان مرشح الحزب الوطني يستند الي قوة مستفيدة جدا من الاستقرار و الوضع الحالي و الي قوة الحزب بينما سيكون الثاني مستند الي شرعية الرغبة الحقيقية في التغيير والتي كلما صدقت سيكون التغيير قادم قوي
دعابة : بعد كل ده نتيجة الانتخابات هتتزور و تطلع لصالح السيد جمال مبارك و يبقي هو الرئيس برضه و كل سنة و انتوا طيبين لأن في ناس مقتنعة تماما انه الرئيس تماما في حين ان الامر كله في علم الغيب و الله أعلم

بسرعة : صديقي أحمد سميح منذ انشاء الفيس بوك عمل جروب اسمه هتعمل ايه لما تعرف ان الرئيس مبارك مات

تخاريف .... أنا رئيس الوزراء

تشرفت اليوم بمقابلة السيد الرئيس و اطلعني علي مهام منصبي كرئيس للوزراء و كلفني بالبدء في اختيار السادة الزملاء في الوزراة الجديدة و سابدأ المشاورات من الغد "هكذا كان تصريحي الاول عقب اختياري رئيسا للوزارة و قد شرعت علي الفور - خلوا بالكم من شرعت دي لاني بقيت رئيس وزراء و هقول كلام من الكبير – في اختيار الزملاء و الاصدقاء عملية اختيار الوزراء في مصر معقدة شوية و خصوصا لما تبقي رئيس وزراء لانك مش ادامك أي خيارات غير بتوع الحزب الوطني او الموظفين أو الجيش و الثلاثة اسوأ من بعض و لكني قررت ان اقدم مقترحات للرئيس و هو يختار بقي لان الموضوع معقد

المهم انا في كام وزارة كده في بالي قولت اركز عليهم و هما هيخلوا البلد دي تنتعش اول وزارة خطرت علي بالي هي وزارة التعليم لان الناس كرهت عيشتها بسببه ف تشاورت و بقي هناك اسمان يصلحان لهذه المهمةالاول : أحمد العسيلي الثاني : أحمد سميح طبعا لكل منهم مميزاته عسيلي عنده افكار كويسة لتطوير التعليم و نهضة البلد دي و اخونا احمد سميح عنده افكار برضه في نفس الاتجاه مع قليل من البهارات السياسية في فك سيطرة الاخوان المسلمين علي البلد لكن تم حسم الموقع صالح عسيلي لسببين :

الاول: الترتيب الابجدي للحروف و يبقي ده عدل (شوفتوا انا رئيس وزراء بدأت عهدي بالعدل أهو)

الثاني : ان سميح ينفع في أي حتة تانية و كمان لانه صديقي لو مش جبته في الوزارة مش هيعترض و عموما انا فكرت برضه في ترشيح سميح شيخ للازهر او رئيس للجامعة بتاعتها بس ده قرار اكبر مني.

الوزارة التانية اللي حيرتني هي وزارة الاعلام بس في الاخر لقيت ان الاستاذ بلال فضل خير من يتولاها لانه اساسا مش مؤمن بوجودها و بالتالي هيخلي الاعلام "حر" و تبقي البلد فيها ديمقراطية بجد و اهو نوع من الرشوة علشان اضمن انه لم يشتمني " هو هيشتم هيشتم " الناس تقول ما هو منهم ولو رفض انا هعمل فيه مقلب و اجيب تامر امين و يبقي هو اللي رفض يخدم الشعب و مصر لما طلبته.

الحقيقة في واحد انا فكرت كثير اخليه يمسك وزارة بس للاسف مش لاقي افضل من انه يتزعم المعارضة لكذا سبب الواحد ده هو عمر طاهر و يتزعم المعارضة للاسباب التالية :

انه زملكاوي يعني من الاقلية

ان عمر مش بطبيعته معارض انما مش بيتكلم الا لما بيجيب اخره و بالتالي هتضمن معارض نزيه

انه بطبيعته مش بيحب القيود بتاعت الاجتماعات و الرغي اللي احنا بنعمله في الوزارة بتاعتنا دي

وزارة الشباب و الرياضة و في ناس كثير اقترحت اسم ابو تريكة بس انا مش حاولت اجازف قبل مباراة الجزائر و خصوصا اني مش عايز اخسر الزملكاوية و احنا داخلين علي سنة انتخابات فكرت في مرتضي منصور و رانيا علواني و الخطيب بس في الاخر اخدت قرار تاريخي و قررت اني ارجع الدكتور عبد المنعم عمارة و اهو نبقي "بالحب اتجمعنا " و يرجع نادي حورس و انجازته.

ننتقل الي وزارة اخري و هي وزارة الصحة و قررت اني المنافسة محصورة بين مها رادميس و امينة شلباية او الدكتور احمد عكاشة و لكن احنا عايزين وزارة برضه من الشباب و مها رادميس ضحكتها حلوة فتبقي هي دي.

قررت كمان اني هستحدث وزارة لرجال الاعمال تدافع عن مصالحهم بدل ما هما في المجلس و الحزب و كل حتة و بيقولوا من حقنا ندافع عن مصالحنا خلاص نعملهم وزارة و نسميها وزارة الاستثمار و دعم رجال الاعمال و يتولاها الاستاذ الاخ الفاضل اللي بيقدم برنامج البورصة اليوم علي قناة او تي في اللي شغال تقريبا نص وقت القناة ..... بيتعب.

و بما ان ال markting ده بقي علم جامد و كبير و لازم الحكومة تتواكب – خدوا بالكم من تتواكب دي برضه- فقررت بقي اني اضرب عصفورين بحجر و اخلي وزارة شئون مجلس الوزراء و اجيب فيها مروة رخا علشان نبقي دعمنا المرأة و في نفس الوقت سوقنا للحكومة الجديدة صح.

وزارة التموين هجيب فيها محمد العربي صديقي .... عنده خبرة حلوة اوي عن عربيات الفول (بحكم اننا بنفطر سوا و نتبادل الخبرات حول افضل العربات) في مصر و يقدر يوفرها للشعب و كمان سياسي و ملتزم و اعتقد انه خير من يتولي هذه الوزارة

وزارات الدفاع و الخارجية و البيئة اصر الرئيس علي انه عنده اسماء هي اللي هتتولاها باقي الوزارات انا خليت كل واحد يعرف حد يرشحه و كان في ابليكشن ملوها و عملنا انترفيوهات و ربنا كرم و شكلنا الوزارة الحمد لله

جائزة لأوباما و الانسانية

ربما الصدفة البحتة هي التي جعلتني أفضل الجلوس في المنزل ليلة الخميس 8-10 عن النزول الي اللقاء الاسبوعي المعتاد للأصدقاء و في اصرار لم أعهده منذ زمن في نفسي فيما يخص القراءة قررت الانتهاء من كتاب اوباما " أحلام من أبي " والذي أهداني اياه الصديق العزيز أحمد سميح منذ عدة شهور و لم تتاح لي فرصة قراءته الا منذ فترة قصيرة.

الكتاب هو سيرة ذاتية تميز كاتبها بأسلوب سرد روائي أكثر من رائع و عقب انتهائي من قراءة الكتاب كان اول ما خطر في بالي ان هذا الرجل يستحق ما هو أكثر من رئاسة أمريكا فهو له تجربة انسانية ملهمة جدا و يمكن لمن قرأ الكتاب ان يلاحظ هذا بالفعل و خصوصا انه كتبه قبل ان يدخل حتي مجلس الشيوخ و منذ فترة طويلة

خلال تصفحي الاخبار في منتصف نهار الجمعة عرفت بأنه فاز بالجائزة و كان اول شعور لي هو السعادة البالغة – ليس لفوزه – و لكن لتصوري ان من منحوه الجائزة – التي لم أكن اعلم انه مرشح لها – سمعوني ليلة أمس و انا اقول انه رمز انساني أكبر من الولايات المتحدة و رئاستها و لا أعلم لماذا ايضا تذكرت السادات حين كان يقول في كتابه الرائع " البحث عن الذات" انني رئيس الجمهورية لأنني انور السادات و لست انور السادات رئيس الجمهورية"

جائزة للانسانية و ليست للسياسة :

اوباما هو تجسيد حي لتجربة انسانية رائعة خليط من نجاح علي ارض مازالت قادرة علي انجاب الاحلام و الامل و تقديم نماذج للحرية و الديمقراطية وقادرة رغم كل التحفظات علي لفت انظارنا لها.
نموذج لتكافؤ الفرص و تخطي الصعاب اللون و العرق و تخطي احباطات الحياة و نموذج للتسامح و قبول الاخر.

هو أمل في زمن نسينا نحن فيه هذه الكلمة بسبب تخلفنا و جهلنا و انشغالنا بمعارك وهمية عن النقاب و استقالة المرشد و نسينا اننا في استطلاعات الرأي الدولة الاخيرة في املنا في مستقبل افضل.
يا أصدقائي فلسطين و العراق و أفغانستان هي جزء من العالم – و ليست كل العالم – و في ظل تعقيدات السياسة أصبحت هذه القضايا و الملفات ليست معيارية في الحكم علي أي شئ
وتذكروا ان اوباما لم يدخل هذه الحروب بل وصل ليجدها علي قائمة من القضايا التي يجب التعامل معها فلا يجب ان نحمله اخطائنا
فحينما بدأ الصراع العربي الاسرائيلي لم يكن مولودا و حينما هزمنا في 67 كان عمره حوالي 6 اعوام و حينما دخل بوش افغانستان كان مازال اوباما يعاني من احباط فشله في اول انتخابات يخوضها علي مستوي ولايته و من عدم تمكنه من حضور مؤتمر حزبه و فشله في دفع اقامة و اشتراك المؤتمر لافلاسه
وحينما دخل بوش العراق كان اوباما يجاهد في عامه الاول في الكونجرس محاولا فهم ما يحدث

ترشيح هذا الرجل في فبراير و بمجرد نجاحه في انتخابات الرئاسة و لم يكن قد أمضي شهرا في الحكم و لكن من رشحوه و اختاروه بسرعة اعترافا و تقدريا لأوباما الانسان و تتويجا لتجربته الملهمة التي بها الكثير من العبر و ربما قبل ان تحيطه السياسة بتعقيداتها و حساباتها التي تبدو احيانا غير انسانية لم يخلقها هو و لكن سيكون عليه التعامل معها
فلنتوقف عن الحكم علي العالم بمعاييرنا الفاشلة و موقف العالم من قضايانا المملة
ربما ينجح اوباما في سياسته او يفشل و لكن هذه ليست القضية ان نجاحه في الانتخابات هو نجاح للأنسانية و واحدة من اعظم اختراعتها و المسماة بالديمقراطية و بختم أمريكي.

انا و جمال مبارك و الاعلام الجديد

وجدت نفسي و بعد عودتي من اجازة في الاسكندرية ( و ما أدراكم ما الاسكندرية بالنسبة لي ) مدعو الي تدريب حزبي موضوعه استخدام الاعلام الجديد
ذهبت وقبل ان اذهب في الحقيقة لم اضع أي توقعات لما يمكن ان اراه هناك و لكن زيادة تأمين قولت اتصل كده اشوف ايه الموضوع و برضه مش وصلت لحاجة ... كنت هناك في الميعاد و وجدت عدد كبير من الشباب أعرف وجوه اغلبهم من الحزب و قليل اعرفهم من خارجه و بعض من لا اعرفهم
و بدأت التفاصيل و الحقائق تتضح و هي كالتالي :
- السيد جمال مبارك أمين السياسات بالحزب الوطني سيلتقي مع مجموعة من شباب المعيدين و المدرسين المساعدين بمجموعة من الكليات في اطار ايصال رسالة الحزب الي كل فئات المجتمع.
- استغل الحزب هذه المناسبة ( وهي مناسبة عادية جدا) في محاولة اختراق و قياس ما يمكن ان نطلق عليه الاعلام الجديد.
- دشن الحزب حملة شارك و جعل لها هذا الموقع و فتح النقاش حول كل القضايا و بحرية كاملة .
- كان علي من يرغب في ارسال أي اسئلة او الاستفسار عن أي شئ ان من خلال الموقع .
- الهدف من التدريب هو خلق جروب علي الفيس بوك يدخل به الشباب الموجودين و يشتبكون مع الافكار المعارضة و محاولة الاشتباك مع الاخرين الي مناقشات موضوعية حول سياسيات الحزب و ادخال شباب الحزب الي تلك المواقع بشكل منظم .
علمت ايضا ان الحزب الوطني بدأ في دراسة أدوات الاعلام الجديد بعد ما حدث في ايران و انهم بدأ بموقع تويتر و لكنهم لم يجدوا له تأثير يذكر داخل المجتمع المصري و ان الاكثر تأثيرا منه هو الفيس بوك و اليوتيوب.
و أرد الحزب ان يقتحم هذا العالم و يجرب نفسه فيه
و كما سبق ان أشرت اللقاء هو لقاء عادي للسيد جمال مبارك و لكن اراد ان يجرب تسويقه علي الفيس البوك الا ان هذا ليس فيه مشكلة.
القائمين علي الحزب الوطني من أتباع الفكر الجديد لديهم رؤية واضحة ملخصها ان سياسات الحزب الوطني ناجحة و قوية و ثابتة ولكن المشكلة الاساسية في الاعلام الذي يقوم بتشويه تلك السياسات – و الانجازات احيانا- و ان هناك أدلة كثيرة علي هذا منها حملة الضرائب و التي حققت نجاحا مبهرا و اعادت ثقة المواطن في قطاع هام من الدولة و هو الضرائب.
و عيب هذا المنطق الاساسي انه رغم اعترافه ببعض الاخطاء الا انه لا يعترف بحجمها و يتجاهل بعضها الاخر و يعتقد ان العيب في تسويق السياسات و ليس في السياسات نفسها .
ولكن شتان بين الاثنين فالمشكلة من وجهة نظري ان الناس في مصر لا تشعر بالتحسن او بالتقدم علي المستويات التي تعنيهم البطالة ... التعليم .....الصحة ......الفساد و البيروقراطية .....المحليات ..... و الاهم من كل هذا الامل في مستقبل ....استطلاعات رأي الحزب الوطني تقول ان المؤشرات (معقولة) و لكن استطلاع اخر من خارج مصر يقول انا مصر الشعب فيها هو أكثر الشعوب التي تعيش بلا أمل في المستقبل ضمن ما يقرب من 150 دولة في العالم
و هذه هي معضلة الحزب الوطني
السياسات نظريا صحيحة و لكنها لا تعمل مع الواقع المصري و هنا تظهر براعة السياسي وليس عظمة السياسات. ان السياسي هو الرجل الذي يصنع السياسات و يطبقها و يجعل الناس تلتف حولها
عبد الناصر كان سياسي ملهم ....سياسته أغلبها خطأ و لكن براعته جعلته يجمع الناس حولها
من النماذج الناجحة من السياسيين الناجحين (كلينتون – مهاتير محمد – الحريري ) و بالتالي المنظومة كلها تحتاج الي اعادة بناء

ملخص ما قلته للسيد جمال مبارك :

تحدثت للسيد جمال مبارك ضمن من تحدثوا وأثرت بشكل سريع قضايا وهذه بعضها وليس كلها:
تداول السلطة داخل الحزب و كان رأيي ان تكون الدورة الحزبية 4 سنوات يتم تجديدها مرة واحدة فقط لكل قيادات الاحزاب في الاقسام و المحافظات و يتم استثناء الامين و أمين التنظيم و ذكرت مثال لأمين الشباب في دائرتي و الذي ظل لمدة 15 عاما و خرج بعد ان حصل علي 187 صوتا في انتخابات مجلس الشعب أي انه لم يحقق نجاح و لم يقيمه أحد و انني يجب ان يكون لي أمل في تولي منصب داخل الحزب .... و هو ما اشارت التسريبات التي نشرتها المصري اليوم بشكل غير دقيق انني تحدثت عن تداول السلطة.

اعتقال و ملاحقة المدونين و ان احتجاز مدون في المطار (كنت أقصد وائل عباس) و مصادرة اللاب توب الخاص به وكذلك اعتقال الطبيب في الفيوم وتوجيه تهمة قلب نظام الحكم له رغم انه لا يوجد دليل سوي مدونته و طلبت منه ان يكون الامن و الداخلية أكثر حكمة في التعامل مع هذه المسائل لأن هذا ضد الحرية و هناك فرق بين الخلاف السياسي و قمع الحرية في الاولي الاختلاف موجود و في الثانية التضامن – بغض النظر عن القضية – واجب واخبرته ايضا ان هذه التصرفات تمنح البعض بطولات وهمية للبعض.

علي الهامش :

- كتب السيد بلال فضل نقلا عن أحد الشباب في مقالته نقدا و تزويرا لما حدث و في الحقيقة انني كنت حاضرا و لم يحدث ما قاله هذا الشاب لبلال الفضل و الامر كان في غاية التحضر و الرقي و لم يحدث ان طلب احد من احد ان يقوم بعمل أكثر من حساب بل كان المطلوب هو التعبير عن النفس بكامل الحرية و عدم الانجراف في مهاترات بل و كان كل الحاضرين علي مستوي متحضر و لا اتصور ان يحدث ان يطلب احد من أي فتاة ان تخلع الحجاب و تتصور صورة اخري ..ولأني موجود و مشارك و متداخل مع الجميع لم يحدث أمامي ما ذكره مرسل الرسالة بأي شكل.
- كان تدريب ممتع ما قامت به مؤسسة كارنيجي عن اساليب الحوار .... و الاجمل حينما تناقش الشباب حول قضية التوريث و لعبوا دور المعارضة بطريقة قبلتها قيادات الحزب الوطني و خاف منها بعض شبابه الجبناء و لنا حديث أخر عن شائعات التوريث
- التقيت لأول مرة الأستاذ المهندس / أحمد عز أمين تنظيم الحزب و دار بيننا نقاش لطيف حول التنظيم الحزبي
- وفقا لمعلوماتي لم يتم حذف أي تعليقات سوي التي تحتوي علي سباب.

لا تنسوا ايضا ..... انا و جمال مبارك و الاصلاح

تحياتي

وحشتيني اوي ...

وحشتيني أوي .. ...بس خلاص

انا معترض ....اذن انا محمود

الصورة اللي لاقيتها و الكلام اللي فيها لا يعبر عن رأيي

كل اما اقول رأيي في أي حاجة الاقي تهمة يفتحوها ليا من علبة زي السردين كده و هي اني دائما معترض
و بغض النظر عن ان هذا نوع من الارهاب الفكري و الحجر علي رأيي بترك النقاش حول اصل الموضوع و الحديث دائما حول شخصي و رأيي والنوايا الداخلية لي في الاعتراض و احيانا في هدم "الصورة" الجميلة للاشياء او حب الظهور و الاختلاف
لاحظوا معي حكاية " الصورة"
بس الحقيقة بقي ان السردين بتاعكم قديم و ريحته وحشة و بايظ
انا مش عايز اقعد اتكلم و احط نفسي في موقف دفاع لان انا اساسا مش في هذا الموقف
بس خلينا نوضح شوية حاجات
اول حاجة و اهم حاجة ان حرية الرأي دي حاجة مهمة جدا و ان الانسان له كامل الحرية في التعبير عن الرأي مهما كان غريب او مختلف ولا يقبله الناس
و في مقولة بتقول "ان كل الافكار الشائعة الان كانت شاذة قبل ذلك" مع العلم اني عمري ما قلت افكار شاذة و لكن انا بشوف العالم المتقدم فيه ايه و بقول نعمل زيهم
انا انطلق في رأيي دائما من منطلقين
الحرية و التقدم
الحرية تعني ان لكل فرد ان يفعل ما يشاء طالما انه في اطار القانون ولا سلطة لشخص او دين او لاحد علي احد
التقدم هو : ﺘﺤﺴﻥ ﻓﻲ ﺍﻟﺤﻴﺎﺓ، ﻭﻫﻭ ﺘﻁﻭﺭ ﻭﻨﻤﻭ ﺘﺩﺭﻴﺠﻲ ﻓﻲ ﺍﻟﺘﻨﻤﻴﺔ ﻭﻓﻲﺍﻟﻤﻌﺭﻓﺔ
و في رأيي ان الحرية هي التي تصنع التقدم
يمكن مفهوم الحرية هو من المفاهيم شوية التي تثير جدل و خصوصا اذا تلامس مع بعض الافكار او الاديان او بعض السلطات
انما بقي اللي مش بفهم الاختلاف حوله و فيه هو التقدم
في حاجة كده اسمها " العالم المتقدم " و في مقولة اخري "العالم الحر"
طبعا هو مش عالم مثالي ولا وردي و لا هو الجنة و انا لما بتكلم عنه مش بلغي ثقافتنا ولا هويتنا ولا أي كلام من ده
لكن افضل من عالمنا القبيح
نقول أمثلة بسرعة :
الشعب الاسباني لما تخلص من الحكم الديكتاتوري و اصبح ديمقراطي و منتج و متقدم و زاد متوسط دخل الفرد ....زاد متوسط طول الشعب 20 سنتيمتر في 30 سنة .....يعني التقدم يساوي حياة افضل و صحة افضل وناس أطول
و طبعا الجهلاء هيقولوا و ازاي قاسوا طول الشعب ....دلوقتي في علوم بتقيس كل حاجة و بتقيس حتي درجة الرضا و السعادة و احنا الحمد لله طلعنا اخر دولة في العالم علي مقياس السعادة كمان
اسبانيا دي تترجم سنويا عدد من الكتب يفوق ما يترجمه العرب مجتمعين ..... واحنا لسه بنقول نترجم كتب من اسرائيل ولا ده تطبيع
في البلاد المتقدمة مفيش حاجة اسمها مواضيع لا يجوز الحديث عنها ولو فيه بتبقي باتفاق الاغلبية برضه
وممكن حد يسيب كل حاجة حلوة و يمسك في حاجة صغيرة جدا و يتعمل عليها فيلم
يعني مثلا اوباما لما سلم علي ملك السعودية و انحني ليه انحناءة احترام وفقا لمفهوم اوباما قامت الدنيا و هاجت و ماجت و الناس قالت يستقيل و دي خيانة و قيل كل ما قيل ولكنها الحرية
انا عايز أي حد يفتح أي فيلم تسجيلي علي قناة الحرة و يشوف الناس تنتقد ازاي النظام السياسي الامريكي مثلا ... او في بريطانيا عايز حد يشوف ما حدث مثلا مع فضيحة حزب العمال الحاكم و الاستقالات الجماعية و لم يقل احد صورة بريطانيا
احنا بقي الطبخات بتاعتنا ناقصة زي السردين اللي في العلب اللي بتفتحوها دائما
يعني الناس لا تتقن اعمالها و تجامل و تنافق و اذا طلبت محاسبة او سؤال يبقي انت بتشوه الصورة و ما هو كله كده و الدنيا و ماشية و مش تعقد الامور
و مش لازم كله يبقي بالمسطرة
اه مش لازم كله يبقي بالمسطرة بس في نفس الوقت مش لازم الناس تبقي مبحباها اوي كده ولما اتكلم الاقي تهمة انت معترض
ايوا انا معترض علي أي افكار هشوف انها هتجيبنا ورا
ولو انا قولت حاجة ضد الحرية او التقدم و مش موجودة في اول 20 دولة في العالم المتقدم يبقي الناس ليها عندي حق من بتوع العرب

خدعوك فقالوا صورة مصر ....و انسي الاصل

انا بعتذر عن اني اسئت الي البهوات الموقرين المحترمين لاعبين مصر و شوهت صورة مصر كل ما تكلم واحد يقولك "صورة مصر " و مش المفروض ان عمرو اديب ولا اي حد جوة او برة يتكلم عن اي حاجة علشان صورة مصر انا مش هتكلم عن المنتخب لكن هتكلم عن صورة مصر لما نقول فيه صورة لازم يكون في اصل و اصل اي شئ اهم من صورته يعني مش ينفع اقعد اتكلم عن الصورة واعيد و ازيد عن الصورة و اسيب الاصل ....في حاجة اسمها تجميل لكن اكثر من تجميل الصورة يبقي نفاق و تزوير و المكياج لما بيزيد بيخلي الشكل قبيح و بنبقي عاملين زي البلياتشو الاصل ان مصر متخلفة و الزبالة في الشارعالاصل المنتخب محترم و بيصلي و بس بيخسر كل الماتشات المهمة و مش عارفين نروح كاس العالم و لا مرة في حين انهم مش مهم يكونوا بيصلوا او لا او بيعرفوا بنات او لا لكن المهم انهم يكسبوا مش مهم القطة بيضاء او سوداء المهم انها بتصاد الفيران الاصل ان الدولة المفروض تبحث عن التقدم مش عن تحسين صورتها ..... بالكذب و اخفاء الحقائق و النفاق الاصل هو الشفافية و المحاسبة و المسائلة علي الاخطاء الاصل ان المواطن في مصر مش بياخد حقه وفي كليبات لمواطنين كثير يتم انتهاك ادميتهم .... لما انا اتكلم يبقي انا بشوه صورة مصر طيب ومحدش ليه بيتكلم عن الاصل ؟؟؟؟ احنا اساتذة في تحسين صورة و تتويه الكلام احنا اصحاب فكرة الاداء المشرف ..... مفيش حاجة في الدنيا اسمها كده ....فيه رحنا نلعب بطولة يا كسبنا ...يا خسرنا احنا اصحاب فكرة النكسة .....الحروب مش فيها نكسة و وكسة ....فيها حاربت ...يا انتصرت يا اتهزمت و علشان تكسب اي حاجة مش هتكسبها بصورتك الحلوة ....هتكسبها بأصلك القوي لما تكون شركة خاصة كل واحد يعمل فيها اللي هو عايزه و ساعتها ممكن صاحب الشركة اللي هو حر في ماله يقول الصورة لكن في البلاد و السياسة و احوال العباد لا و الف لا لما تكون مؤسسة عامة او تقدم خدمة عامة او فريق او اي شئ له علاقة بالناس لابد ان تكون الاولوية للمحاسبة نقول تطبيقات في العالم المتقدم امريكا ( اللي كسبتنا 3 و مكملة في البطولة ) يعني مش مهم الاداء المشرف المهم انها محققة معدل احسن مننا نحو تحقيق الهدف ( وصلت للمربع الذهبي ) امريكا دي لو تفتكروا من كام سنة رئيسها الحليوة كلينتون كان متورط في علاقة مع مونيكا محدش جاب سيرة صورة امريكا خاااالص لكن الاصل في الموضوع هو المحاسبة و المسائلة و الشفافية وبأي صيغة و بأي شكل وبأي الفاظ ( حدي نسي البيه الرئيس كان بيشرح هي عملت ايه بالظبط ؟؟؟) اتفرجوا يا ناس شوفوا اي برنامج في التلفزيونات في العالم المتقدم و هو بيتريق و بيسخر من كل حاجة فاكرين فيلم 11 فهرنهايت و مايكل مور ........ محدش قال صورة امريكا فاكرين فيلم حين ميسرة و هي فوضي ....... كلنا قولنا صورة مصر انا ضد فكرة الحفاظ علي الصورة و ان مشاكلنا نحلها جوانا لا و الف لا احنا نفتح كل الملفات و بكل الاشكال و اللي عايز حاجة يقول و اللي يتكلم يتكلم و الحقائق و الشفافية تسد عين الشمس ومهما كان الجرح قاسي و الاصل سئ فتوضيح الحقائق السيئة و التصدي لها بشجاعة افضل كثير من تحسين الصورة اقولكم مثل حلو ..... النهاردة بعد ما الحقيقة بانت و عمرو اديب بقي شكله وحش ....انتوا بتقولوا ايه ....عمرو اديب بقي شكله وحش .....هو بيفقد جزء من مصداقيته لو افترضنا انه خسر .... و ان كنت اتصور انه الفائز الوحيد بان اصلا الناس اهتمت هو بيقول ايه وحتي لو فيه تجاوز منه و او من اي حد فهو ده ضريبة الحرية اللي هي اضرارها اقل ولو الحقيقة ظهرت كله بيسكت علي العكس بقي ضريبة الاستمرار في تحسين الصورة هو تدمير الاصل تماما علي فكرة بقي ....الاصل اننا خسرنا من امريكا وخرجنا من البطولة بسبب لاعبين بيصلوا الحمد لله بس مستهترين و مش اد المسئولية انا بقي من بتوع الاصل مش الصورة

مومس في غرف المنتخب

هذه الصورة ليست من مقر اقامة اللاعبين

انا بقي مستغرب جدا
كل الناس كاتبة بتهاجم عمرو اديب
اولا نخرج ام عمرو اديب من الموضوع
في جرايد و بوليس جنوب افريقيا قالوا .... كدب او صدق ده موضوع يتم مناقشته بشكل مختلف
نفتح بقي
اللاعبين اتسرقوا
عادي
ممكن يكون الفندق فيه حرامية وان كان دي مستبعدة
اصلهم مش نازلين في فندق المحطة في رمسيس
لكن ماشي
الفندق حرامية
اللعيبة اتسرقت
عادي و بتحصل
فجأة جريدة خدت تصريحات و قالت ان البوليس لقي ان كان فيه بنات في الاوتيل مع اللعيبة
الجريدة دي مش جريدة النبأ علي الرصيف اللي قدام فندق المحطة في رمسيس
لا برضه دي صنداي ورلد
يعني لما تاخد كلام بيبقي غالبا صح و هما كمان قالوا ان ده حصل و قالوا اسم الشارع و جابوا ناس من الاوتيل عاملين امن فيه ( اللي هما متهمين انهم حرامية) و هما دووول بقي الي سرقوا و شهدوا علي الشرفاء في المنتخب انهم كان معاهم بنات )
ممكن يكون البوليس لقي موضوع العاهرات دي يلزق فيها الكلام ده
يعني واحد معاه مومس و اتسرق مش عرفوا اللي سرق ...هيقولوا غالبا المومس ....بس الشهادات و الكلام انه فيه مومس
اعتقد ان اللاعبين اذكي من الظباط و مش هيصوروا نفسهم ..... بس ربما برضه
نيجي بقي للمنتخب
اللاعبين ردهم لطيف اووووي
بسم الله الرحمن الرحيم
احنا يا جماعة بنصلي ..... ومدش قال ايه اللي حصل بالظبط و لا حتي اسماء اللاعبين اللي اتسرقوا
و ان دي مؤامرة علشان جنوب افريقيا تظهر للعالم انها تقدر تنظم كاس العالم
و كأن العالم اللي اعطي جنوب افريقيا صوته و احنا خدنا صفر مستني شهادة اللاعبين المصريين علي قدرة جنوب افريقيا علي التنظيم .... اختيار جنوب افريقيا تم و هم علي علم تاااااااام انها اقل دول العالم امنا
بس تقول ايه بقي زناخة المخ
و بعدين كابتن المنتخب يروح مصدر لك ابو تريكة في المكالمة
علي اساس ان ده الحيطة ....طبعا ابو تريكة محترم ...بس مين جاب اسمه في الموضوع هما قالوا 5 لاعبين ولو سألت اي حد ملوش حتي في الكورة هيقولك علي اسمائهم و لو طلبت يستبعد حد ملوش دعوة بالكلام ده هيكون اول حد ابو تريكة
--------------
الغرض بقي من كل الفيلم ده و اللي نرفز عمرو اديب و نرفزني و حرق دمي و البلد كلها
ان اداء المنتخب ادائه وحش اصلا و دي لازم فيه حساب
لللللللللللللللللللللليه ؟؟؟
لان دي فلوسنا و ده اسم بلدنا اللي بقي في الوحل و دي لعيبة لا مؤاخذة بتكسب ماتش و تروح تنام مع بنات و تخسر اللي بعده ........ الصورة كده حتي لو هي مش كده
لان مفيش حساب
و مش هفكركم بالسوابق و قعدات اللعيبة و الشيشة جنب معسكر المنتخب في دار الدفاع الجوي و المدرب نايم
يعني من الاخر هما مش علي الصراط المستقيم
يالا بقي انا زهقت منكم
جتهم الارف عيال نجسة .... و ناس أنجس طول الليل سهرانين يدوروا علي السكس علي الانترنت و يقولوا الكلام في السكس عيب
-------------------
رابط المجلة اللي نشرت