تخاريف .... أنا رئيس الوزراء

تشرفت اليوم بمقابلة السيد الرئيس و اطلعني علي مهام منصبي كرئيس للوزراء و كلفني بالبدء في اختيار السادة الزملاء في الوزراة الجديدة و سابدأ المشاورات من الغد "هكذا كان تصريحي الاول عقب اختياري رئيسا للوزارة و قد شرعت علي الفور - خلوا بالكم من شرعت دي لاني بقيت رئيس وزراء و هقول كلام من الكبير – في اختيار الزملاء و الاصدقاء عملية اختيار الوزراء في مصر معقدة شوية و خصوصا لما تبقي رئيس وزراء لانك مش ادامك أي خيارات غير بتوع الحزب الوطني او الموظفين أو الجيش و الثلاثة اسوأ من بعض و لكني قررت ان اقدم مقترحات للرئيس و هو يختار بقي لان الموضوع معقد

المهم انا في كام وزارة كده في بالي قولت اركز عليهم و هما هيخلوا البلد دي تنتعش اول وزارة خطرت علي بالي هي وزارة التعليم لان الناس كرهت عيشتها بسببه ف تشاورت و بقي هناك اسمان يصلحان لهذه المهمةالاول : أحمد العسيلي الثاني : أحمد سميح طبعا لكل منهم مميزاته عسيلي عنده افكار كويسة لتطوير التعليم و نهضة البلد دي و اخونا احمد سميح عنده افكار برضه في نفس الاتجاه مع قليل من البهارات السياسية في فك سيطرة الاخوان المسلمين علي البلد لكن تم حسم الموقع صالح عسيلي لسببين :

الاول: الترتيب الابجدي للحروف و يبقي ده عدل (شوفتوا انا رئيس وزراء بدأت عهدي بالعدل أهو)

الثاني : ان سميح ينفع في أي حتة تانية و كمان لانه صديقي لو مش جبته في الوزارة مش هيعترض و عموما انا فكرت برضه في ترشيح سميح شيخ للازهر او رئيس للجامعة بتاعتها بس ده قرار اكبر مني.

الوزارة التانية اللي حيرتني هي وزارة الاعلام بس في الاخر لقيت ان الاستاذ بلال فضل خير من يتولاها لانه اساسا مش مؤمن بوجودها و بالتالي هيخلي الاعلام "حر" و تبقي البلد فيها ديمقراطية بجد و اهو نوع من الرشوة علشان اضمن انه لم يشتمني " هو هيشتم هيشتم " الناس تقول ما هو منهم ولو رفض انا هعمل فيه مقلب و اجيب تامر امين و يبقي هو اللي رفض يخدم الشعب و مصر لما طلبته.

الحقيقة في واحد انا فكرت كثير اخليه يمسك وزارة بس للاسف مش لاقي افضل من انه يتزعم المعارضة لكذا سبب الواحد ده هو عمر طاهر و يتزعم المعارضة للاسباب التالية :

انه زملكاوي يعني من الاقلية

ان عمر مش بطبيعته معارض انما مش بيتكلم الا لما بيجيب اخره و بالتالي هتضمن معارض نزيه

انه بطبيعته مش بيحب القيود بتاعت الاجتماعات و الرغي اللي احنا بنعمله في الوزارة بتاعتنا دي

وزارة الشباب و الرياضة و في ناس كثير اقترحت اسم ابو تريكة بس انا مش حاولت اجازف قبل مباراة الجزائر و خصوصا اني مش عايز اخسر الزملكاوية و احنا داخلين علي سنة انتخابات فكرت في مرتضي منصور و رانيا علواني و الخطيب بس في الاخر اخدت قرار تاريخي و قررت اني ارجع الدكتور عبد المنعم عمارة و اهو نبقي "بالحب اتجمعنا " و يرجع نادي حورس و انجازته.

ننتقل الي وزارة اخري و هي وزارة الصحة و قررت اني المنافسة محصورة بين مها رادميس و امينة شلباية او الدكتور احمد عكاشة و لكن احنا عايزين وزارة برضه من الشباب و مها رادميس ضحكتها حلوة فتبقي هي دي.

قررت كمان اني هستحدث وزارة لرجال الاعمال تدافع عن مصالحهم بدل ما هما في المجلس و الحزب و كل حتة و بيقولوا من حقنا ندافع عن مصالحنا خلاص نعملهم وزارة و نسميها وزارة الاستثمار و دعم رجال الاعمال و يتولاها الاستاذ الاخ الفاضل اللي بيقدم برنامج البورصة اليوم علي قناة او تي في اللي شغال تقريبا نص وقت القناة ..... بيتعب.

و بما ان ال markting ده بقي علم جامد و كبير و لازم الحكومة تتواكب – خدوا بالكم من تتواكب دي برضه- فقررت بقي اني اضرب عصفورين بحجر و اخلي وزارة شئون مجلس الوزراء و اجيب فيها مروة رخا علشان نبقي دعمنا المرأة و في نفس الوقت سوقنا للحكومة الجديدة صح.

وزارة التموين هجيب فيها محمد العربي صديقي .... عنده خبرة حلوة اوي عن عربيات الفول (بحكم اننا بنفطر سوا و نتبادل الخبرات حول افضل العربات) في مصر و يقدر يوفرها للشعب و كمان سياسي و ملتزم و اعتقد انه خير من يتولي هذه الوزارة

وزارات الدفاع و الخارجية و البيئة اصر الرئيس علي انه عنده اسماء هي اللي هتتولاها باقي الوزارات انا خليت كل واحد يعرف حد يرشحه و كان في ابليكشن ملوها و عملنا انترفيوهات و ربنا كرم و شكلنا الوزارة الحمد لله

جائزة لأوباما و الانسانية

ربما الصدفة البحتة هي التي جعلتني أفضل الجلوس في المنزل ليلة الخميس 8-10 عن النزول الي اللقاء الاسبوعي المعتاد للأصدقاء و في اصرار لم أعهده منذ زمن في نفسي فيما يخص القراءة قررت الانتهاء من كتاب اوباما " أحلام من أبي " والذي أهداني اياه الصديق العزيز أحمد سميح منذ عدة شهور و لم تتاح لي فرصة قراءته الا منذ فترة قصيرة.

الكتاب هو سيرة ذاتية تميز كاتبها بأسلوب سرد روائي أكثر من رائع و عقب انتهائي من قراءة الكتاب كان اول ما خطر في بالي ان هذا الرجل يستحق ما هو أكثر من رئاسة أمريكا فهو له تجربة انسانية ملهمة جدا و يمكن لمن قرأ الكتاب ان يلاحظ هذا بالفعل و خصوصا انه كتبه قبل ان يدخل حتي مجلس الشيوخ و منذ فترة طويلة

خلال تصفحي الاخبار في منتصف نهار الجمعة عرفت بأنه فاز بالجائزة و كان اول شعور لي هو السعادة البالغة – ليس لفوزه – و لكن لتصوري ان من منحوه الجائزة – التي لم أكن اعلم انه مرشح لها – سمعوني ليلة أمس و انا اقول انه رمز انساني أكبر من الولايات المتحدة و رئاستها و لا أعلم لماذا ايضا تذكرت السادات حين كان يقول في كتابه الرائع " البحث عن الذات" انني رئيس الجمهورية لأنني انور السادات و لست انور السادات رئيس الجمهورية"

جائزة للانسانية و ليست للسياسة :

اوباما هو تجسيد حي لتجربة انسانية رائعة خليط من نجاح علي ارض مازالت قادرة علي انجاب الاحلام و الامل و تقديم نماذج للحرية و الديمقراطية وقادرة رغم كل التحفظات علي لفت انظارنا لها.
نموذج لتكافؤ الفرص و تخطي الصعاب اللون و العرق و تخطي احباطات الحياة و نموذج للتسامح و قبول الاخر.

هو أمل في زمن نسينا نحن فيه هذه الكلمة بسبب تخلفنا و جهلنا و انشغالنا بمعارك وهمية عن النقاب و استقالة المرشد و نسينا اننا في استطلاعات الرأي الدولة الاخيرة في املنا في مستقبل افضل.
يا أصدقائي فلسطين و العراق و أفغانستان هي جزء من العالم – و ليست كل العالم – و في ظل تعقيدات السياسة أصبحت هذه القضايا و الملفات ليست معيارية في الحكم علي أي شئ
وتذكروا ان اوباما لم يدخل هذه الحروب بل وصل ليجدها علي قائمة من القضايا التي يجب التعامل معها فلا يجب ان نحمله اخطائنا
فحينما بدأ الصراع العربي الاسرائيلي لم يكن مولودا و حينما هزمنا في 67 كان عمره حوالي 6 اعوام و حينما دخل بوش افغانستان كان مازال اوباما يعاني من احباط فشله في اول انتخابات يخوضها علي مستوي ولايته و من عدم تمكنه من حضور مؤتمر حزبه و فشله في دفع اقامة و اشتراك المؤتمر لافلاسه
وحينما دخل بوش العراق كان اوباما يجاهد في عامه الاول في الكونجرس محاولا فهم ما يحدث

ترشيح هذا الرجل في فبراير و بمجرد نجاحه في انتخابات الرئاسة و لم يكن قد أمضي شهرا في الحكم و لكن من رشحوه و اختاروه بسرعة اعترافا و تقدريا لأوباما الانسان و تتويجا لتجربته الملهمة التي بها الكثير من العبر و ربما قبل ان تحيطه السياسة بتعقيداتها و حساباتها التي تبدو احيانا غير انسانية لم يخلقها هو و لكن سيكون عليه التعامل معها
فلنتوقف عن الحكم علي العالم بمعاييرنا الفاشلة و موقف العالم من قضايانا المملة
ربما ينجح اوباما في سياسته او يفشل و لكن هذه ليست القضية ان نجاحه في الانتخابات هو نجاح للأنسانية و واحدة من اعظم اختراعتها و المسماة بالديمقراطية و بختم أمريكي.

انا و جمال مبارك و الاعلام الجديد

وجدت نفسي و بعد عودتي من اجازة في الاسكندرية ( و ما أدراكم ما الاسكندرية بالنسبة لي ) مدعو الي تدريب حزبي موضوعه استخدام الاعلام الجديد
ذهبت وقبل ان اذهب في الحقيقة لم اضع أي توقعات لما يمكن ان اراه هناك و لكن زيادة تأمين قولت اتصل كده اشوف ايه الموضوع و برضه مش وصلت لحاجة ... كنت هناك في الميعاد و وجدت عدد كبير من الشباب أعرف وجوه اغلبهم من الحزب و قليل اعرفهم من خارجه و بعض من لا اعرفهم
و بدأت التفاصيل و الحقائق تتضح و هي كالتالي :
- السيد جمال مبارك أمين السياسات بالحزب الوطني سيلتقي مع مجموعة من شباب المعيدين و المدرسين المساعدين بمجموعة من الكليات في اطار ايصال رسالة الحزب الي كل فئات المجتمع.
- استغل الحزب هذه المناسبة ( وهي مناسبة عادية جدا) في محاولة اختراق و قياس ما يمكن ان نطلق عليه الاعلام الجديد.
- دشن الحزب حملة شارك و جعل لها هذا الموقع و فتح النقاش حول كل القضايا و بحرية كاملة .
- كان علي من يرغب في ارسال أي اسئلة او الاستفسار عن أي شئ ان من خلال الموقع .
- الهدف من التدريب هو خلق جروب علي الفيس بوك يدخل به الشباب الموجودين و يشتبكون مع الافكار المعارضة و محاولة الاشتباك مع الاخرين الي مناقشات موضوعية حول سياسيات الحزب و ادخال شباب الحزب الي تلك المواقع بشكل منظم .
علمت ايضا ان الحزب الوطني بدأ في دراسة أدوات الاعلام الجديد بعد ما حدث في ايران و انهم بدأ بموقع تويتر و لكنهم لم يجدوا له تأثير يذكر داخل المجتمع المصري و ان الاكثر تأثيرا منه هو الفيس بوك و اليوتيوب.
و أرد الحزب ان يقتحم هذا العالم و يجرب نفسه فيه
و كما سبق ان أشرت اللقاء هو لقاء عادي للسيد جمال مبارك و لكن اراد ان يجرب تسويقه علي الفيس البوك الا ان هذا ليس فيه مشكلة.
القائمين علي الحزب الوطني من أتباع الفكر الجديد لديهم رؤية واضحة ملخصها ان سياسات الحزب الوطني ناجحة و قوية و ثابتة ولكن المشكلة الاساسية في الاعلام الذي يقوم بتشويه تلك السياسات – و الانجازات احيانا- و ان هناك أدلة كثيرة علي هذا منها حملة الضرائب و التي حققت نجاحا مبهرا و اعادت ثقة المواطن في قطاع هام من الدولة و هو الضرائب.
و عيب هذا المنطق الاساسي انه رغم اعترافه ببعض الاخطاء الا انه لا يعترف بحجمها و يتجاهل بعضها الاخر و يعتقد ان العيب في تسويق السياسات و ليس في السياسات نفسها .
ولكن شتان بين الاثنين فالمشكلة من وجهة نظري ان الناس في مصر لا تشعر بالتحسن او بالتقدم علي المستويات التي تعنيهم البطالة ... التعليم .....الصحة ......الفساد و البيروقراطية .....المحليات ..... و الاهم من كل هذا الامل في مستقبل ....استطلاعات رأي الحزب الوطني تقول ان المؤشرات (معقولة) و لكن استطلاع اخر من خارج مصر يقول انا مصر الشعب فيها هو أكثر الشعوب التي تعيش بلا أمل في المستقبل ضمن ما يقرب من 150 دولة في العالم
و هذه هي معضلة الحزب الوطني
السياسات نظريا صحيحة و لكنها لا تعمل مع الواقع المصري و هنا تظهر براعة السياسي وليس عظمة السياسات. ان السياسي هو الرجل الذي يصنع السياسات و يطبقها و يجعل الناس تلتف حولها
عبد الناصر كان سياسي ملهم ....سياسته أغلبها خطأ و لكن براعته جعلته يجمع الناس حولها
من النماذج الناجحة من السياسيين الناجحين (كلينتون – مهاتير محمد – الحريري ) و بالتالي المنظومة كلها تحتاج الي اعادة بناء

ملخص ما قلته للسيد جمال مبارك :

تحدثت للسيد جمال مبارك ضمن من تحدثوا وأثرت بشكل سريع قضايا وهذه بعضها وليس كلها:
تداول السلطة داخل الحزب و كان رأيي ان تكون الدورة الحزبية 4 سنوات يتم تجديدها مرة واحدة فقط لكل قيادات الاحزاب في الاقسام و المحافظات و يتم استثناء الامين و أمين التنظيم و ذكرت مثال لأمين الشباب في دائرتي و الذي ظل لمدة 15 عاما و خرج بعد ان حصل علي 187 صوتا في انتخابات مجلس الشعب أي انه لم يحقق نجاح و لم يقيمه أحد و انني يجب ان يكون لي أمل في تولي منصب داخل الحزب .... و هو ما اشارت التسريبات التي نشرتها المصري اليوم بشكل غير دقيق انني تحدثت عن تداول السلطة.

اعتقال و ملاحقة المدونين و ان احتجاز مدون في المطار (كنت أقصد وائل عباس) و مصادرة اللاب توب الخاص به وكذلك اعتقال الطبيب في الفيوم وتوجيه تهمة قلب نظام الحكم له رغم انه لا يوجد دليل سوي مدونته و طلبت منه ان يكون الامن و الداخلية أكثر حكمة في التعامل مع هذه المسائل لأن هذا ضد الحرية و هناك فرق بين الخلاف السياسي و قمع الحرية في الاولي الاختلاف موجود و في الثانية التضامن – بغض النظر عن القضية – واجب واخبرته ايضا ان هذه التصرفات تمنح البعض بطولات وهمية للبعض.

علي الهامش :

- كتب السيد بلال فضل نقلا عن أحد الشباب في مقالته نقدا و تزويرا لما حدث و في الحقيقة انني كنت حاضرا و لم يحدث ما قاله هذا الشاب لبلال الفضل و الامر كان في غاية التحضر و الرقي و لم يحدث ان طلب احد من احد ان يقوم بعمل أكثر من حساب بل كان المطلوب هو التعبير عن النفس بكامل الحرية و عدم الانجراف في مهاترات بل و كان كل الحاضرين علي مستوي متحضر و لا اتصور ان يحدث ان يطلب احد من أي فتاة ان تخلع الحجاب و تتصور صورة اخري ..ولأني موجود و مشارك و متداخل مع الجميع لم يحدث أمامي ما ذكره مرسل الرسالة بأي شكل.
- كان تدريب ممتع ما قامت به مؤسسة كارنيجي عن اساليب الحوار .... و الاجمل حينما تناقش الشباب حول قضية التوريث و لعبوا دور المعارضة بطريقة قبلتها قيادات الحزب الوطني و خاف منها بعض شبابه الجبناء و لنا حديث أخر عن شائعات التوريث
- التقيت لأول مرة الأستاذ المهندس / أحمد عز أمين تنظيم الحزب و دار بيننا نقاش لطيف حول التنظيم الحزبي
- وفقا لمعلوماتي لم يتم حذف أي تعليقات سوي التي تحتوي علي سباب.

لا تنسوا ايضا ..... انا و جمال مبارك و الاصلاح

تحياتي

وحشتيني اوي ...

وحشتيني أوي .. ...بس خلاص

انا معترض ....اذن انا محمود

الصورة اللي لاقيتها و الكلام اللي فيها لا يعبر عن رأيي

كل اما اقول رأيي في أي حاجة الاقي تهمة يفتحوها ليا من علبة زي السردين كده و هي اني دائما معترض
و بغض النظر عن ان هذا نوع من الارهاب الفكري و الحجر علي رأيي بترك النقاش حول اصل الموضوع و الحديث دائما حول شخصي و رأيي والنوايا الداخلية لي في الاعتراض و احيانا في هدم "الصورة" الجميلة للاشياء او حب الظهور و الاختلاف
لاحظوا معي حكاية " الصورة"
بس الحقيقة بقي ان السردين بتاعكم قديم و ريحته وحشة و بايظ
انا مش عايز اقعد اتكلم و احط نفسي في موقف دفاع لان انا اساسا مش في هذا الموقف
بس خلينا نوضح شوية حاجات
اول حاجة و اهم حاجة ان حرية الرأي دي حاجة مهمة جدا و ان الانسان له كامل الحرية في التعبير عن الرأي مهما كان غريب او مختلف ولا يقبله الناس
و في مقولة بتقول "ان كل الافكار الشائعة الان كانت شاذة قبل ذلك" مع العلم اني عمري ما قلت افكار شاذة و لكن انا بشوف العالم المتقدم فيه ايه و بقول نعمل زيهم
انا انطلق في رأيي دائما من منطلقين
الحرية و التقدم
الحرية تعني ان لكل فرد ان يفعل ما يشاء طالما انه في اطار القانون ولا سلطة لشخص او دين او لاحد علي احد
التقدم هو : ﺘﺤﺴﻥ ﻓﻲ ﺍﻟﺤﻴﺎﺓ، ﻭﻫﻭ ﺘﻁﻭﺭ ﻭﻨﻤﻭ ﺘﺩﺭﻴﺠﻲ ﻓﻲ ﺍﻟﺘﻨﻤﻴﺔ ﻭﻓﻲﺍﻟﻤﻌﺭﻓﺔ
و في رأيي ان الحرية هي التي تصنع التقدم
يمكن مفهوم الحرية هو من المفاهيم شوية التي تثير جدل و خصوصا اذا تلامس مع بعض الافكار او الاديان او بعض السلطات
انما بقي اللي مش بفهم الاختلاف حوله و فيه هو التقدم
في حاجة كده اسمها " العالم المتقدم " و في مقولة اخري "العالم الحر"
طبعا هو مش عالم مثالي ولا وردي و لا هو الجنة و انا لما بتكلم عنه مش بلغي ثقافتنا ولا هويتنا ولا أي كلام من ده
لكن افضل من عالمنا القبيح
نقول أمثلة بسرعة :
الشعب الاسباني لما تخلص من الحكم الديكتاتوري و اصبح ديمقراطي و منتج و متقدم و زاد متوسط دخل الفرد ....زاد متوسط طول الشعب 20 سنتيمتر في 30 سنة .....يعني التقدم يساوي حياة افضل و صحة افضل وناس أطول
و طبعا الجهلاء هيقولوا و ازاي قاسوا طول الشعب ....دلوقتي في علوم بتقيس كل حاجة و بتقيس حتي درجة الرضا و السعادة و احنا الحمد لله طلعنا اخر دولة في العالم علي مقياس السعادة كمان
اسبانيا دي تترجم سنويا عدد من الكتب يفوق ما يترجمه العرب مجتمعين ..... واحنا لسه بنقول نترجم كتب من اسرائيل ولا ده تطبيع
في البلاد المتقدمة مفيش حاجة اسمها مواضيع لا يجوز الحديث عنها ولو فيه بتبقي باتفاق الاغلبية برضه
وممكن حد يسيب كل حاجة حلوة و يمسك في حاجة صغيرة جدا و يتعمل عليها فيلم
يعني مثلا اوباما لما سلم علي ملك السعودية و انحني ليه انحناءة احترام وفقا لمفهوم اوباما قامت الدنيا و هاجت و ماجت و الناس قالت يستقيل و دي خيانة و قيل كل ما قيل ولكنها الحرية
انا عايز أي حد يفتح أي فيلم تسجيلي علي قناة الحرة و يشوف الناس تنتقد ازاي النظام السياسي الامريكي مثلا ... او في بريطانيا عايز حد يشوف ما حدث مثلا مع فضيحة حزب العمال الحاكم و الاستقالات الجماعية و لم يقل احد صورة بريطانيا
احنا بقي الطبخات بتاعتنا ناقصة زي السردين اللي في العلب اللي بتفتحوها دائما
يعني الناس لا تتقن اعمالها و تجامل و تنافق و اذا طلبت محاسبة او سؤال يبقي انت بتشوه الصورة و ما هو كله كده و الدنيا و ماشية و مش تعقد الامور
و مش لازم كله يبقي بالمسطرة
اه مش لازم كله يبقي بالمسطرة بس في نفس الوقت مش لازم الناس تبقي مبحباها اوي كده ولما اتكلم الاقي تهمة انت معترض
ايوا انا معترض علي أي افكار هشوف انها هتجيبنا ورا
ولو انا قولت حاجة ضد الحرية او التقدم و مش موجودة في اول 20 دولة في العالم المتقدم يبقي الناس ليها عندي حق من بتوع العرب

خدعوك فقالوا صورة مصر ....و انسي الاصل

انا بعتذر عن اني اسئت الي البهوات الموقرين المحترمين لاعبين مصر و شوهت صورة مصر كل ما تكلم واحد يقولك "صورة مصر " و مش المفروض ان عمرو اديب ولا اي حد جوة او برة يتكلم عن اي حاجة علشان صورة مصر انا مش هتكلم عن المنتخب لكن هتكلم عن صورة مصر لما نقول فيه صورة لازم يكون في اصل و اصل اي شئ اهم من صورته يعني مش ينفع اقعد اتكلم عن الصورة واعيد و ازيد عن الصورة و اسيب الاصل ....في حاجة اسمها تجميل لكن اكثر من تجميل الصورة يبقي نفاق و تزوير و المكياج لما بيزيد بيخلي الشكل قبيح و بنبقي عاملين زي البلياتشو الاصل ان مصر متخلفة و الزبالة في الشارعالاصل المنتخب محترم و بيصلي و بس بيخسر كل الماتشات المهمة و مش عارفين نروح كاس العالم و لا مرة في حين انهم مش مهم يكونوا بيصلوا او لا او بيعرفوا بنات او لا لكن المهم انهم يكسبوا مش مهم القطة بيضاء او سوداء المهم انها بتصاد الفيران الاصل ان الدولة المفروض تبحث عن التقدم مش عن تحسين صورتها ..... بالكذب و اخفاء الحقائق و النفاق الاصل هو الشفافية و المحاسبة و المسائلة علي الاخطاء الاصل ان المواطن في مصر مش بياخد حقه وفي كليبات لمواطنين كثير يتم انتهاك ادميتهم .... لما انا اتكلم يبقي انا بشوه صورة مصر طيب ومحدش ليه بيتكلم عن الاصل ؟؟؟؟ احنا اساتذة في تحسين صورة و تتويه الكلام احنا اصحاب فكرة الاداء المشرف ..... مفيش حاجة في الدنيا اسمها كده ....فيه رحنا نلعب بطولة يا كسبنا ...يا خسرنا احنا اصحاب فكرة النكسة .....الحروب مش فيها نكسة و وكسة ....فيها حاربت ...يا انتصرت يا اتهزمت و علشان تكسب اي حاجة مش هتكسبها بصورتك الحلوة ....هتكسبها بأصلك القوي لما تكون شركة خاصة كل واحد يعمل فيها اللي هو عايزه و ساعتها ممكن صاحب الشركة اللي هو حر في ماله يقول الصورة لكن في البلاد و السياسة و احوال العباد لا و الف لا لما تكون مؤسسة عامة او تقدم خدمة عامة او فريق او اي شئ له علاقة بالناس لابد ان تكون الاولوية للمحاسبة نقول تطبيقات في العالم المتقدم امريكا ( اللي كسبتنا 3 و مكملة في البطولة ) يعني مش مهم الاداء المشرف المهم انها محققة معدل احسن مننا نحو تحقيق الهدف ( وصلت للمربع الذهبي ) امريكا دي لو تفتكروا من كام سنة رئيسها الحليوة كلينتون كان متورط في علاقة مع مونيكا محدش جاب سيرة صورة امريكا خاااالص لكن الاصل في الموضوع هو المحاسبة و المسائلة و الشفافية وبأي صيغة و بأي شكل وبأي الفاظ ( حدي نسي البيه الرئيس كان بيشرح هي عملت ايه بالظبط ؟؟؟) اتفرجوا يا ناس شوفوا اي برنامج في التلفزيونات في العالم المتقدم و هو بيتريق و بيسخر من كل حاجة فاكرين فيلم 11 فهرنهايت و مايكل مور ........ محدش قال صورة امريكا فاكرين فيلم حين ميسرة و هي فوضي ....... كلنا قولنا صورة مصر انا ضد فكرة الحفاظ علي الصورة و ان مشاكلنا نحلها جوانا لا و الف لا احنا نفتح كل الملفات و بكل الاشكال و اللي عايز حاجة يقول و اللي يتكلم يتكلم و الحقائق و الشفافية تسد عين الشمس ومهما كان الجرح قاسي و الاصل سئ فتوضيح الحقائق السيئة و التصدي لها بشجاعة افضل كثير من تحسين الصورة اقولكم مثل حلو ..... النهاردة بعد ما الحقيقة بانت و عمرو اديب بقي شكله وحش ....انتوا بتقولوا ايه ....عمرو اديب بقي شكله وحش .....هو بيفقد جزء من مصداقيته لو افترضنا انه خسر .... و ان كنت اتصور انه الفائز الوحيد بان اصلا الناس اهتمت هو بيقول ايه وحتي لو فيه تجاوز منه و او من اي حد فهو ده ضريبة الحرية اللي هي اضرارها اقل ولو الحقيقة ظهرت كله بيسكت علي العكس بقي ضريبة الاستمرار في تحسين الصورة هو تدمير الاصل تماما علي فكرة بقي ....الاصل اننا خسرنا من امريكا وخرجنا من البطولة بسبب لاعبين بيصلوا الحمد لله بس مستهترين و مش اد المسئولية انا بقي من بتوع الاصل مش الصورة

مومس في غرف المنتخب

هذه الصورة ليست من مقر اقامة اللاعبين

انا بقي مستغرب جدا
كل الناس كاتبة بتهاجم عمرو اديب
اولا نخرج ام عمرو اديب من الموضوع
في جرايد و بوليس جنوب افريقيا قالوا .... كدب او صدق ده موضوع يتم مناقشته بشكل مختلف
نفتح بقي
اللاعبين اتسرقوا
عادي
ممكن يكون الفندق فيه حرامية وان كان دي مستبعدة
اصلهم مش نازلين في فندق المحطة في رمسيس
لكن ماشي
الفندق حرامية
اللعيبة اتسرقت
عادي و بتحصل
فجأة جريدة خدت تصريحات و قالت ان البوليس لقي ان كان فيه بنات في الاوتيل مع اللعيبة
الجريدة دي مش جريدة النبأ علي الرصيف اللي قدام فندق المحطة في رمسيس
لا برضه دي صنداي ورلد
يعني لما تاخد كلام بيبقي غالبا صح و هما كمان قالوا ان ده حصل و قالوا اسم الشارع و جابوا ناس من الاوتيل عاملين امن فيه ( اللي هما متهمين انهم حرامية) و هما دووول بقي الي سرقوا و شهدوا علي الشرفاء في المنتخب انهم كان معاهم بنات )
ممكن يكون البوليس لقي موضوع العاهرات دي يلزق فيها الكلام ده
يعني واحد معاه مومس و اتسرق مش عرفوا اللي سرق ...هيقولوا غالبا المومس ....بس الشهادات و الكلام انه فيه مومس
اعتقد ان اللاعبين اذكي من الظباط و مش هيصوروا نفسهم ..... بس ربما برضه
نيجي بقي للمنتخب
اللاعبين ردهم لطيف اووووي
بسم الله الرحمن الرحيم
احنا يا جماعة بنصلي ..... ومدش قال ايه اللي حصل بالظبط و لا حتي اسماء اللاعبين اللي اتسرقوا
و ان دي مؤامرة علشان جنوب افريقيا تظهر للعالم انها تقدر تنظم كاس العالم
و كأن العالم اللي اعطي جنوب افريقيا صوته و احنا خدنا صفر مستني شهادة اللاعبين المصريين علي قدرة جنوب افريقيا علي التنظيم .... اختيار جنوب افريقيا تم و هم علي علم تاااااااام انها اقل دول العالم امنا
بس تقول ايه بقي زناخة المخ
و بعدين كابتن المنتخب يروح مصدر لك ابو تريكة في المكالمة
علي اساس ان ده الحيطة ....طبعا ابو تريكة محترم ...بس مين جاب اسمه في الموضوع هما قالوا 5 لاعبين ولو سألت اي حد ملوش حتي في الكورة هيقولك علي اسمائهم و لو طلبت يستبعد حد ملوش دعوة بالكلام ده هيكون اول حد ابو تريكة
--------------
الغرض بقي من كل الفيلم ده و اللي نرفز عمرو اديب و نرفزني و حرق دمي و البلد كلها
ان اداء المنتخب ادائه وحش اصلا و دي لازم فيه حساب
لللللللللللللللللللللليه ؟؟؟
لان دي فلوسنا و ده اسم بلدنا اللي بقي في الوحل و دي لعيبة لا مؤاخذة بتكسب ماتش و تروح تنام مع بنات و تخسر اللي بعده ........ الصورة كده حتي لو هي مش كده
لان مفيش حساب
و مش هفكركم بالسوابق و قعدات اللعيبة و الشيشة جنب معسكر المنتخب في دار الدفاع الجوي و المدرب نايم
يعني من الاخر هما مش علي الصراط المستقيم
يالا بقي انا زهقت منكم
جتهم الارف عيال نجسة .... و ناس أنجس طول الليل سهرانين يدوروا علي السكس علي الانترنت و يقولوا الكلام في السكس عيب
-------------------
رابط المجلة اللي نشرت

انفلونزا الطيور في مصرو الان الخنازير

>

التواجد الامني و منع تام لاي تصوير

هذه التدوينة مشتركة مع محمد عز الدين
مساء الخير
اعلنت الجامعة الامريكية بالقاهرة عن حالتين اصابة بانفلونزا الخنازير في سكن الطلاب التابع للجامعة بالزمالك
و قد انتقلت الي هناك فور علمي بالخبر علي رأس وفد رفيع المستوي و معي كاميرا محمد عز الدين و استطعت التقاط بعض الصور و الفيديوهات الحصرية بعد مطاردة من البوليس اللطيف ...برضه بوليس الزمالك حاجة تانية
و قد وجدت كل مندوبي القنوات الفضائية و الصحفيين واقفين ايد ورا و ايد

الجميل و الجديد في الخبر ان وزارة الصحة بعد الكشف علي الطالبين اعلنت المعامل خلوهم من المرض و هو عكس النتائج التي اتت بها المعامل التابعة لوزارة الدفاع الامريكية في مصر

يعني من الاخر محدش يثق كالعادة في رأي الحكومة

مبني سكن طلاب الجامعة

ظباط المباحث و منع تام لاي تصوير او لقاءات
مراسلي القنوات الفضائية

و اصدرت الجامعة البيان التالي :

Security Update
For information about safety and security on campus, and information about AUC-sponsored trips and travel, visit the health and safety page.
Message From The Chair of The Emergency Management Team
The Egyptian Ministry of Health confirmed positive H1N1 test results for two AUC students the evening of June 7th. The students have been hospitalized and are receiving the necessary medical treatment. A third student was also hospitalized as a cautionary measure because she had a high fever, which is symptomatic of this flu. These students are all residents of the university’s Zamalek dormitory and, as a result, the dormitory has been quarantined for 24 hours. The Ministry of Health has obtained samples from all residents of the dormitory and those results are expected this evening. The university’s administration is working closely with the Egyptian Ministry of Health to effectively manage this situation and is prepared to take any additional precautions that are necessary. Members of the AUC community who experience flu-type symptoms, such as high fever, are being encouraged to contact the AUC Clinic. As we receive further information, it will be shared immediately with the AUC community and on this webpage. 

Brian MacDougall


VP Planning and Administration
Chair,

Emergency Management Team

لأ هاتها يمين شوية

(مشترك بين محمد عز الدين و بيني)
كل الناس تشيد بقدرة السيد اوباما علي الالقاء و انه لا يقرأ خطابه من أي ورقة وفي الحقيقة انني كنت متصور هكذا فعلا الي ان صدمني صديقي محمد عز بحديثه عن الشاشات التي يقرأ منها اوباما خطبه و التي يطلق عليها Teleprompte و هي تقنية يستخدمها ايضا مذيعي التلفزيون و تكون معكوسة علي الكاميرا
ولا يمكن انكار ان اوباما له كاريزما خاصة و حضور طاغي و قدرة علي جذب الاستماع الا ان التصور السائد انه لا ينظر لورق هو تصور خاطئ
هنا نص الترجمة الرسمي من خطاب اوباما باللغة العربية ( المصدر البيت الابيض)
و ستجدون هنا فيديو لاوباما وهو يشير للمساعدين بأن الجهاز تعطل و فقد تركيزه في لقاءه مع الجماهير

الاجهزة التي يقرأ منه اوباما خطبته في جامعة القاهرة و واضح انه ينظر لها

صورة الجهاز الذي يقرأ منه قبل بداية الخطاب و حوله علامة سوداء

اوباما يقرأ خطابه و ينظر للجهاز

دائما ما يستخدمها

اول فيديو و صورة من داخل قاعة جامعة القاهرة

انتظروا بعد قليل الخطاب كامل مصحوب بالترجمة

هشام طلعت مصطفي و الاعدام - اسئلة و اجوبة

فيديوهات الحكم





علي هامش قضية هشام طلعت مصطفي - اسئلة و اجوبة عن حكم الاعدام
لماذا حكم الاعدام ؟
لان قانون العقوبات بيقول بالنص كده
" مادة 40 :–
يعد شريكا فى الجريمة :
اولا : كل من حرص على ارتكاب الفعل المكون للجريمة اذا كان هذا الفعل قد وقع بناء على هذا التحريض .
ثانيا : من اتفق مع غيرة على ارتكاب الجريمة فوقعت بناء على هذا الاتفاق .
ثالثا :من اعطى للفاعل او الفاعلين سلاحا اوالات او اى شىء اخر مما استعمل فى ارتكاب الجريمة مع علمة بها او ساعدهم باى طريقة اخرى فى الاعمال المجهزة او المسهلة او المتممة لارتكابها .
و المادة التي تنطبق علي هشام طلعت مصطفي
235 :-
المشاركون فى القتل الذى يستوجب الحكم على فاعله بالاعدام يعاقبون بالاعدام او بالاشغال الشاقة المؤبدة

هل الحكم نهائي ؟
لا . في حاجة في القانون اسمها حق الانسان في درجات مختلفة للتقاضي لضمان اقصي درجة من العدالة
و ده معناه ان السيد هشام طلعت مصطفي لم يستنفذ سوي درجة واحدة و مازال امامه فترة طويلة حتي يصبح الحكم النهائي بل قد تعاد المحاكمة كلها من البداية
ما معني احالة اوراقه للمفتي ؟
احالة الاوراق للمفتي هي امر يجب علي المحكمة ان تقوم به قبل النطق بحكم الاعدام
لماذا ؟
لان الاعدام هو نظام مستمد من الشريعة الاسلامية و فقا لحد القصاص و بالتالي فالمفتي هو من يتأكد من توافر الشروط الشرعية للقصاص.
وفي حالة هشام طلعت مصطفي سيكون النطق بالحكم في يوم 25 يونيو بعد استطلاع رأي المفتي

هل يمكن تخفيف الحكم في حالة قبول النقض من هشام طلعت؟
نعم للمحكمة التي ستنظر القضية مرة اخري في حالة قبول النقض منه ان تقرر ما تشاء و كان الحكم الاول لم يكن موجود و لكن هذا مرتبط بما سيقدمه المحامون في اسباب نقض الحكم

نص مادة القانون الخاصة بالقتل ة التي تنطبق علي السكري و اتصور ان المحكمة رأت ان هناك ترصد :
مادة 230 :-
كل من قتل نفسا عمدا مع سبق الاصرار على ذلك او الترصد يعاقب بالاعدام .
مادة 231 :-
الاصرار السابق هو القصد المصمم عليه قبل الفعل لارتكاب جنحة او جناية يكون غرض المصر منها ايذاء شخص معين او اى شخص غير معين وجده او صادفه سواء كان ذلك القصد معلقا على حدوث امر او موقوفا على شرط .
مادة 232 :-
الترصد هو تربص الانسان لشخص فى جهة او جهات كثيرة مدة من الزمن طويلة كانت او قصيرة ليتوصل الى قتل ذلك الشخص او الى ايذائة بالضرب ونحوه .

حفيد الرئيس مبارك في ذمة الله

فيديو نادر للفقيد حفيد الرئيس في مباراة مصر و المغرب في كأس الامم الافريقية

البقاء لله

جنازة حفيد الرئيس و التأثر واضح علي والد الفقيد و عمه

اخر تحديث الساعة العاشرة و نصف مساءا بتوقيت القاهرة

الرئيس مبارك ودع حفيده في مستشفي الجلاء و لم يستطع حضور الجنازة و كان الفقيد قد عاد من باريس صباح يوم الثلاثاء علي متن طائرة خاصة بعد ان وافته المنية في مساء الاثنين.

و اكدت مصادر قريبة ان الرئيس لم يتم اعلامه بالخبر الا صباح يوم الثلاثاء و ذلك حتي يعود علاء و جمال و زوجتيهما من باريس و يكونوا بجانب الرئيس

وجدير بالذكر ان الوفاة حدثت بسبب نزيف في المخ ولم يعرف سببها الا ان الفقيد كان يعاني من بعض المتاعب التي صاحبت ميلاده

و كان الرئيس قد راجع البيان الصادر عن الرئاسة بنفسه وقد اعلنت الرئاسة في وقت لاحق ان العزاء اقتصر علي الجنازة

----------------------------------------------------------------

كان أصدرت رئاسة الجمهورية صباح اليوم البيان التالى: "يحتسب الرئيس حسنى مبارك عند الله حفيده محمد علاء حسنى مبارك الذى وافته المنية مساء أمس، على أثر الأزمة الصحية التى تعرض لها خلال اليومين الماضيين، وسوف تشيع الجنازة اليوم بعد صلاة العصر من مسجد آل رشدان".

انتهي نص البيان الرئاسي

وكان الفقيد محمد علاء محمد حسني مبارك (13) عاما قد توفي الي رحمة الله في باريس و هو الحفيد الاكبر للرئيس المصري محمد حسني مبارك

الفقيد كان طالبا في مدرسة الشويفات و كان يعاني من بعض التأخر العقلي و له شقيق واحد اصغر منه كان هو قد اختار اسمه بنفسه هو عمر- 6 سنوات - وكان الفقيد قد تعرض لأزمة صحية منذ يومين و تم نقله الي باريس حيث كان يعاني من نزيف في المخ و هبوط في الدورة الدموية صاحبه بعض الاعراض المشابهة للتسمم.

و قد وصل الجثمان صباح الاثنين قادما من باريس.

و سنواليكم بالتطورات

الحفيد مع الجد و الجدة
حينما وجده الرئيس حاضرا احد الاحتفالات امر بأن يجلس بجانبه

صورة لحفيد الرئيس في صغره مع العائلة

كان الرئيس يحبه للغاية


في البدلة العسكرية

انا كمان استراتيجي دارفوري

دارفور

قناة النيل للاخبار و التلفزيون المصري عموما تلفزيون دمه خفيف اوي طلعه علينا بخبير استراتيجي لطيف اسمه د. حمدي السيد (غير نقيب الاطباء) طبعا محدش قال مؤهلاته ولا هو ليه استراتيجي علي اساس انه غالبا من الجيش و اي حاجة تخص الجيش سرية حتي مؤهلات الاستراتجيين اللي زي سعادة معالي حضرته.
البرنامج اساسا اسمه علي ضفاف المتوسط و المفروض بيناقش العلاقات المصرية الاوروبية و عملية برشلونة و الكلام الجميل ده واللي هي اساسا قائمة علي علاقات شراكة سياسية و اقتصادية
لكن دارفور- اللي هي مش علي المتوسط وفقا لمعلوماتي – بقت هي محور الحلقة.
قال ايه بقي الاستراتيجي العظيم
طبعا بعد ما اتوضأ وقال بسم الله الرحمن الرحيم و ان المحكمة الجنائية الدولية غير شرعية و انها عملها يدخل في نطاق انتهاك سيادة الدولة وانها لم تحاكم بوش و بلير وقادة اسرائيل وجرائمهم ضد الانسانية وده المعلوم من حقوق الانسان بالضرورة وان ما يحدث هو محاولة واضحة للسيطرة علي موارد السودان.
المهم بقي استراتيجيا هو كان محامي البشير وكرر كلمة قالها اكثر من 5 مرات وهي ان " الهجوم خير وسيلة للدفاع" ودي طبعا استراتيجية عظيمة هو كشف عنها رغم اني كنت متصور انها من الاسرار العليا للدولة زي مؤهلات حضرته لدرجة اني فكرت اتصل اقولهم في التلفزيون ان الاستراتيجية دي من الاسرار العليا للدولة وازاي هو يتكلم عنها كده و يعلنها للاعداء في المحكمة الدولية.
و بصفته بقي استراتيجي فقرر ان الجامعة العربية و المؤتمر الاسلامي و الاتحاد الافريقي يسعوا بهجوم - لانه خير وسيلة للدفاع - من محورين :
الاول : الغاء قرار توقيف البشير ( وده علي اعتبار ان القرار ده صادر من وكيل نيابة كوم حمادة في البحيرة)
الثاني : تقديم قادة اسرائيل بدل من البشير

للاسف الشديد اني علي اطلاع يكاد يكون متخصص علي هذه القضية والسبب اني اشتغلت فترة كانت قصيرة في برنامج دارفور في مركز القاهرة لدراسات حقوق الانسان
وللاسف برضه اني علي اطلاع عن قرب شديد لكل التقارير الصادرة عن الوضع في دارفور منذ فترة تقارب ال6 اعوام بل وفي احدي التجليات العظيمة وبعد نجاحي في مهام تقصي الحقائق للفتن الطائفية في مصر قررت ان اتوسع و ابقي استراتيجي واعمل شغل اقليمي و اروح اعمل توثيق للجرائم في دارفور وبعدين اكتشفت اني ركبت اخر قطار و ان العالم كله و الامم المتحدة و الامم المتفرقة كمان عملوا تقارير وان الموضوع وفقا للمصطلح العلمي " قتل بحثا".
من وجهة نظري و بعيدا عن التخاريف الاستراتيجية ان العالم يتغير بشكل لم نعد قادرين علي استيعابه و ان السيد الاستراتيجي مازال يتصور اننا في عام 1956 حيث مصر هي مصر و السودان كما هو و امريكا كما هي
ما لا يدركه الخبير ان قضية حقوق الانسان اصبحت من الاولويات الان في العلاقات الدولية وانها لم تعد قضية سياسية فقط او ورقة ضغط بل هناك اليات – احداها – هي المحكمة الجنائية الدولية و التي تعود في فكرتها الي حقبة أراد العالم الحر ان ينهيها تماما منذ الحرب العالمية الثانية حتي و ان كان سوء استغلال من قبل البعض لهذه القضية وان السياسة والانسانية وان اختلفتا احيانا الا انهم موجودتان علي طريق فيلتقيان حينا و يتفرقان احيانا كما في القضية الفلسطينية.
الموقف المصري بقي من الدفاع عن البشير مفهوم
مصر مش عايزة ترسيخ لمفهوم الملاحقة الدولية بسبب حقوق الانسان لان مصر ملفها زي اي دولة عربية مش ناصع البياض يبقي احنا بقي نقطع الطريق من اوله بشوية قطاعين طرق فاهمين استراتيجيا ايه اللي يتعمل في الحاجات دي
في حين ان اساسا البشير ده تورط في محاولة اغتيال الرئيس مبارك بس يبدو ان مستشارو الرئيس ليهم وجهة نظر تانية و خصوصا ان واضح ان اغلبهم من الاستراتجيين اصحاب المؤهلات السرية
علي التلفزيون المصري انه يرحمنا بقي من المصاريف اللي الشعب المصري اولي بيها و يروحوا بقي يعملوا حاجة مفيدة بدل القنوات و الجرايد اللي بتدافع عن البشير دي وحتي لما تقرروا تدافعوا عن البشير ابقوا و حياة ابوكم اختاروا محامين كويسين لاحسن هتلاقوه في السجن.

علي السريع:

تقرير منظمة human rights watch و اللي صادر من 2005 عن الموضوع ده فيه كل التفاصيل و هتلقوه علي الرابط ده
http://www.hrw.org/en/reports/2005/12/08

- الاستراتيجي قال ان اللي حصل هو دعوة لبعض المتمردين للانقلاب علي البشير... هو البشير ده اساسا مش جاي بانقلاب ...ده بقي مش تقوله كلمة عيب وكأن البشير ده يعني جه في انتخابات.
- الاستراتيجي مجبش سيرة اي حاجة تخص الضحايا او عمليات القتل الحاصلة هناك... يعني اتكلم في كل حاجة الا الموضوع الاساسي.

مصر من علي عربية فول

عربة فول مصرية علي سور الازبكية منذ أكثر من 130 عاما

عربة فول في مصر من حوالي 120 عاما

عربة فول مصرية معاصرة لم تختلف كثيرا عن سابقيها

احلي حاجة في مصر لما تقف الصبح علي عربية فول ..... هتعرف مصر اللي محدش يعرفها
لو شاء القدر و حد من اللي بيتشموا مصر نزل و عاش في مصر مش شاف بس الاهرامات و القلعة و اتعشي علي النيل .... هيعرف
مصر لغز محدش يعرفه غير اهلها ...حتي هما لسه مش عارفينه

الناس زعلانة اني بقول مصر اولا و الانسانية بتيجي بعد كده
و انا مصمم علي رأيي .. وهضيف و اقولك كمان ان الانسانية في تراجع لان مصر في تراجع

مصر عندي هي الانسانية

مصر دي بكل حاجة سواء حلوة او وحشة ... ويمكن الحاجات الوحشة قبل الحلوة هي بلدنا

انا لما هتخانق في الشارع مش هروح اشتكي في الامم المتحدة
لكن هروح قسم شرطة في مصر ..حتي لو مش هاخد حقي ...بس برضه هبقي في مصر اللي جزء منها انك مش هتعرف تاخد حقك بسهولة و هتلاقي ظابط غالبا رذل ....انت في مصر

مصر و الناس اللي بتشتمها في الفضائيات و بتضرب سفارتها و اللي كمان بيدافعوا عنهم هنا

مصر مش انتوا ومحدش يتكلم باسم مصر احنا مصريين اه لكن مصر اكبر مننا كلنا
مصر مش مبارك ومش أي رئيس .... مهما قدم لها ...لانها اكيد اديته اكثر ....وحتي لو مش اديته
مصر مش مناضلي الفضائيات
حتي لو مصر بتشتغل ضد القضية الفلسطينية مش معاها .... هي مصر ....
مش هقول اللي مش عجباه مصر.... يسيبها
لكن مصر مش هتقف علي حد مننا

أي حد بيتكلم عن مصر و بيقول انه عارفها
انا عايزه ينزل الصبح يقف علي عربية فول ...اي عربية فول .... اوعي تتكسف انك تاكل من عربية فول .... لو اتكسفت انا ممكن اقول عليك مش مصري واقول عليك خاين
وعربية فول ...مش تاكل فول شبراوي او اخر ساعة او نعمة
شوف مصر الحقيقية
عم احمد بتاع عربية الفول ....دعوته طالعة من القلب تحس بصدقها ...صدق مش هتلاقيه في كل دعوات كل شيوخ الفضائيات و قنواتهم
شوف الروح بتاعت الشعب الصبح وانت علي الفطار .... حلو ولا حار يا استاذ .... تاخد حلويات ؟؟؟ اقطع لي بصل يا ريس
شوف لما الكل واقف جنب بعضه بيدور علي لقمة العيش
حتي لو العيش صعب نلاقيه .... بس في عربية الفول الصبح عمره ما هيختفي
شوف لما تحاسب بعد ما تاكل
و تحس من عم احمد انه فعلا مش عايز ياخد منك فلوس .... مش بيجاملك ...لكن لو في ايده مش هياخد منك فلوس ....كفاية انك اكلت و قولت الحمد لله ..
روح on the run و اشرب الكافيه لاتيه اوليه فرابيه .... وانت مصري برضه ....بس هي دي جزء من مصر اللي محدش يعرفها ..... ومحدش هيعرفها...... فيها الاتنين جنب بعض

انا زعلان علي حال مصر .... المفروض نبقي احسن من كده
كلمة بنقولها في اليوم كلنا 50 مرة و بنحلم بغد احسن بكثير
لكن لو مفيش مصر ..مفيش الحلم ده اساسا
شيرين بتغني و تقول ..مشربتش من نيلها و انا بقول جربت تاكل فول و بصل علي عربية في مصر الصبح ؟؟؟

حكاية غزة و الانسانية المزعومة

كلمة انسانية كما وجدت معناها في ويكيبيديا : حركة فلسفية، كانت تدعوا إلى إعادة الكرامة إلى القيمة الإنسانية، كانت ترجح التفكير العقلاني، وأكدت على تفوق الإنسان بذاته وليس عن طريق القِوى التي لا تخضع لمنطق العقل....فكروا فيها شوية كده ..

كارثة انسانية كلمة ترددت كثير في الفترة الاخيرة مربوطة بقصة غزة

وفي الحقيقة انني حاولت ان اتعاطف مع هذه المقولة فيما يخص غزة فشلت.... مش قادر اتعاطف

اصل لما صخرة جبل تقع علي الناس او يحصل زلزال او فيضان او حتي قطار يتقلب او يتحرق دي كوارث طبيعية او انسانية و حتي لو في شق اهمال انساني لكن هو اهمال مش سياسة معروف مقدماتها و نتائجها لكن دلوقتي ...

ناس اختارات حكومة بتقول انها جاية علشان تعلن الحرب علي اسرائيل و ناس قررت انها تدخل الحرب مع عدو مش معروف عنه انه لما بيحارب بيبقي ذوق و اخلاق

يعني لا اسرائيل جديدة و لا غزة وقع علي دماغهم نيزك

دي ناس كلها قررت انها تدخل في حرب ...

و محدش يقولي ما هو اساسا في ظل السلطة مفيش سلام لاني هقوله اقرا التاريخ من عند اوسلو و انت جاي

و بعدين يقولك العدو بيضرب المدارس و المستشفيات و الجوامع لكن محدش بيقول ان اسرائيل بتقدم للعالم صورة الشاب الشطور بتاع المقاومة ..يحدف البمبة و القمر الصناعي مصوره و يجري يدخل في أي مكان من دول الطيارة تجيبه طبعا و تضربه ...مكان ما يدخل بقي اصله يعني مش هيحدف البمبة واسرائيل هتسكت

الخلاصة اللي انا عايز اقولها مفيش انسانية في الموضوع بقي دي ناس قررت انها عايزة الحرب و لو الشعب الفلسطيني عايز السلام يخرج و يقول للي قاعدين يديروا الحرب من فنادق دمشق ...

لا مش عايزين الحرب او عايزين الحرب

الغريب بقي ان الاخوة المصريين اللي عايزين مصر تفتح المعابر او تعلن الحرب علي اسرائيل كل ما تقول لواحد يقولك ..انسانيا

انت مش انسان يا اخي ؟؟؟!!!!!!

طيب و الانسان في دارفور مثلا و الانسان المعتقل في مصر وفي وسوريا ...

و الحكومة ما صدقت ...

ما لما نتظاهر علشان غزة ..هنروح ننام في الاخر ..و نطلع شوية كبت بدل ما نتظاهر علشان رغيف العيش ولا العبارة

يعني حكاية الانسانية انا مش داخلة دماغي اوي

المهم اننا يعني مش مؤمنين بالانسانية اوي كده ..احنا تاريخنا في حكاية الانسانية دي عرة – بدون نقط - اوي

يعني احنا جوة مصر مع بعض ولا نعرف أي حاجة في الانسانية دي و مش محتاج اذكر امثلة

و لما حصلت احداث 11 سبتمبر مثلا مش قولنا انسانية ...

لا احنا قولنا سياسة امريكا هي السبب و لما الاعصار بيضربها تلاقي الناس تقولك ..ده غضب ربنا

هو احنا الانسانية لكن الناس التانية كفرة ولاد بوبي

ومحدش يقولي شعب غلبان ولا حول ولا قوة علي بتوع غزة لو هو كده يبقي يستسلم اه ....

يستسلم ... عادي يعني ما هو انا يا أد الضرب و استحمل يا اسكت لكن احارب علي اساس اني هرمي بلايا علي مصر ؟؟؟

اللي عايز يناضل... يناضل من جيبه مش من جيب الناس التانية....... واللي يجي بعد كده خير.

مينفعش اقرر اطلع الصحراء اعمل سفاري اسبوع و بعدين اخد زاد ليومين واعتمد ان اخويا هيسيب شغله و يجي يجيب باقي الزاد و اقوله اصل انا بموت.... رغم انه قالي خد معاك حاجتك علشان انا مش فاضي

ما هو يعني مش طريقة انا عارف طبعا اننا هنقول اسرائيل بقي و الوحشية بس يعني ده الغباء بعينه

خلوني اسال شوية اسئلة

هو ليه احنا بس اللي بيحصلنا ده من خمسين سنة ومش بنتعلم ؟؟؟

و ليه برضه الرئيس الوحيد اللي بيتعبروه خاين هو الرئيس الوحيد في كل اللي بيشتموه اللي ارضه محررة ؟؟

و علي العكس ...الرئيس اللي الجماهير الذكية شايلة صورته مات و مصر محتلة مش بس مصر لا كل دول المواجهة و كان بسببه

بالذمة دي ناس حد يسمع كلامها و يمشي وراها ؟؟؟

و مبارك اللي حتي لو اختلف الناس حول سياسته الداخلية لكن هو الوحيد اللي حارب بجد في كل الموجودين حارب حارب يعني و تدريبات و خطة مش شوية بمب من مخبأ و قناة فضائية تعمله زعيم

يعني لو نشغل دماغنا شوية هنعرف ان غزة مش محتاجة دعم غزة محتاجة تفكير لمدة ربع ساعة نفكر ربع ساعة و الله و تبقي الدنيا زي الفل و نسأل سؤال ...مش يمكن احنا مش صح عالطول الخط ؟؟؟

كلامي هيزعل الناس انا عارف بس انا معلش زعلان برضه بس بطريقتي .