ااااه ...... لو تفهمي نفسك

لو تفهمى نفسك ......حترتاحى
لو تفهمى نفسك ......... أنا حارتاح
لو تفهمى نفسك .. .. يمكن ألاقى براح فاتح ايديه الاتنين لأحزانك وأحزانى ...... لأفراحك وأفراحى
لو تفهمى نفسك حترتاحى
لو تفهمى...ان انتى وردة..بس رافضة تتسقى من غير سبب
لو تفهمى...ان انتى صعب تفرقى بين قلبك انتى...واللى جواه اتكتب
لو تفهمى..ان اللى مكتوب ف القلوب مش سهل أبدا انه يقبل يتشطب
حاجات كتير لو تتفهم حاجات كتير بسهولة كانت تختفى

بس انتى آآآآآه لو تعرفى ان انتى كنتى زى طيرحاولت أطير... عشان أزين له السما

وللأسف كتر الدلع..كتر الكلام...كتر السمع
لأ واللى أكتر من كده......

كتر القلوب المغرمة خلوكى حاجة مبهمة
كنتى فى يوم السبب ..... انى ابقى زى الطيراللى بايديكى اندبح
وانتى اللى كنتى السبب ..... فى انه كان صاحى
لوتفهمى نفسك حترتاحى
لو تفهمى نفسك..تحبيها

وساعتها يمكن تعرفى............ تحبى اللى بيحبك

وساعتها يمكن تعرفى تقفى جنب اللى كان دايما يقف جنبك

وكان عامل هواكى سبيل ب يسقى العطشانين منه
وكان يسمع حكاياتك ..... وكان غاوى يفضفضلك

وعايزك تفهمى انه:عمره فى يوم ماحيقولك ..... تعالى تانى من فضلك

لكن نفسه يشوف ف عينيكى نظرة تقول: لقيت نفسى لقيت كل اللى كان نفسى ف يوم ألاقيه
لقيت عقلى اللى خوفنى
لقيت قلبى اللى خفت عليه
لقيت كل اللى كان السر ف جراحى
لو تفهمى نفسك...حترتاحى

قصيدة جميلة للشاعر الجميل الصديق / طارق قطب ...
القصيدة من يوم ما سمعتها منه من كام سنة وانا بجد بحس بيها اوي
وكل مرة بقرأها بحس بيها اكثر
ده موقع طارق علي الفيس بوك ... والديوان بتاعه اسمه
لو راجل زي ما بتقول
http://www.facebook.com/topic.php?uid=5842453292&topic=3428